سعوودیە جارێکی دیکە هۆشداری دەداتە حاجییان لە بەرکەوتنی ڕاستەوخۆ بە تیشکی خۆر

ئاڤا نیوز

وەزارەتی تەندروستیی سعوودیە هۆشداری دایە حاجییان لە بەرکەوتنی ڕاستەوخۆ بە تیشکی خۆر لە کاتژمێرەکانی ڕۆژدا، بەهۆی بەرزبوونەوەی پلەکانی گەرما لە وەرزی حەجی ئەمساڵدا.

وێنە گەورەکە: ئەمڕۆ پێنجشەممە زیاتر لە ملیۆنێک و 650 هەزار کەس لە سەرتاسەری جیهانەوە بە مەبەستی بەجێهێنانی یەکێک لە پایە گەورەکانی حەج، دەچنە سەر کێوی عەرەفە، هاوکات لە سعوودیە پلەکانی گەرما بەرزبوونەتەوە، بە جۆرێک تەندروستیی سعوودیە هۆشداری دەداتە حاجییان.

ڕاگەیێنراوی فەرمی: بەگوێرەی ڕاگەیێنراوی وەزارەتی تەندروستیی سعوودیە "لەکاتی هاتووچۆکردن لەنێوان شوێنە پیرۆزەکاندا چەتر بەکاربهێنرێت، بۆ پتەوکردنی خۆپارێزی لە ماندوێتی بەهۆی گەرماوە. ئەمەش لە چوارچێوەی هەوڵەکانی سیستمی تەندروستیدایە بۆ پاراستنی تەندروستی و سەلامەتی میوانانی خودا، تا بتوانن بە تەندروستی و ئارامییەوە فەریزەکانیان ئەنجام بدەن."

لە هەمان کاتدا: سیستمی تەندروستی هەوڵەکانی چڕدەکاتەوە بۆ بەهێزکردنی خزمەتگوزارییەکانی چاودێریی تەندروستی لە شوێنە پیرۆزەکاندا، هاوکات لەگەڵ بەردەوامبوونی بڵاوبوونەوەی تیمە پزیشکییە پسپۆڕەکان بۆ پێشکەشکردنی چاودێریی تەندروستی خێرا، لەپاڵ چڕکردنەوەی پەیامە هۆشیارکەرەوەکان لەنێو حاجییاندا، کە ئەمەش کوالێتی خزمەتگوزارییە تەندروستییەکان بەرز دەکاتەوە و وەرزی حەجێکی باش و تەندروستیان بۆ مسۆگەر دەکات.

ئەوەی پێویستە بیزانیت: بەگوێرەی پێشبینییەکانی کەشوهەوا، ئەمڕۆ پلەکانی گەرما لە شاری مەککەو و بە دیاریکراویش لە کێوی عەرەفە، لە کاتی نیوەڕۆ دەگاتە 42 پلەو دوای نێوەڕۆ بەرزدەبێتەوە بۆ 44 پلەی سیلیزی.