ئۆتۆمبێلێک دوای 45 ڕۆژ لەژێر بەفری چیای ماکۆک دەرهێنرا

ئاڤا نیوز

گرووپێکی خۆبەخشی ئۆفڕۆد توانییان ئۆتۆمبێلێک لە لوتکەی چیای ماکۆک (ئیدارەی ڕاپەڕین) لەناو بەفر دەربهێنن، دوای ئەوەی بۆ ماوەی مانگ و نیوێک بەتەواوی لەژێر بەفردا مابووەوە.

چیرۆکی سەرەکی: خاوەن ئۆتۆمبێلەکە پاسەوانێکی تاوەری پەیوەندییەکان بووە لە لوتکەی چیاکە. بەهۆی بارینی بەفری زۆر، ئۆتۆمبێلەکەی لەکاتی دەوامدا گیری خواردووە و بەتەواوی داپۆشراوە. لە کاتی دەرهێنانیدا، نزیکەی 2 مەتر بەفر لەسەر ئۆتۆمبێلەکە هەبووە.

زانیاریی زیاتر: دوای 45 ڕۆژ  ئۆتۆمبێلەکە لەژێر بەفردا دەرهێنرا. پێشتر 8 جار هەوڵدراوە بۆ دەرهێنانی و تا دواجار سەرکەوتوو بوون لە دەرهێنانەوەی ئۆتۆمبێلەکە.

نزیکەی 150 ئۆتۆمبێل لەلایەن "گروپی ئۆفڕۆدی حاجیاوا" لەمساڵدا بە خۆبەخشی لەناو بەفر و قوڕ دەرهێنراون.

ئەوەی پێویستە بیزانیت: داستان ئەبوبەکر یەکێک  لە ئەندامی گروپەکە بە ئاڤای گوت: هەشت جار چووین تا توانیمان ئۆتۆمبێلەکە دەربهێنین و ڕادەستی خاوەنەکەی بکەینەوە.

- لە لوتکەی چیای ماکۆک، ژماریەک پاسەوان بەردەوام چاودێریی تاوەرێکی هێڵەکانی پەیوەندیکردن دەکەن، قادر، یەکێک لە پاسەوانەکانی ئەو تاوەرە بە ئاڤای وت، ئەو کۆمەڵە گەنجە هەڵوێستێکی جوان و کارێکی  مرۆڤ دۆستانە دەکەن، ئێمە دەواممان لە شوێنێکی بەرز و سەختە لە وەرزی زستان گرفتی هاتووچۆمان بۆ دروست دەبێت، ئەو گەنجانە هەر پێداویستییەکی وەک خواردن بەنزین یان هەرشتێکمان بوێت بە ئۆتۆمبێلە بەرزەکانی خۆیان دەگەنە لامان، زۆر سوپاسی گیانی هاوکارییان دەکەین.