ڕاوێژكاری ئاسایشی نیشتیمانیی ئەمریكا: جۆ بایدن تاوتوێی ڕێكارەكانی پاراستنی هەرێمی كوردستان دەكات

ئاڤا دیجیتاڵ

 

ڕاوێژكاری ئاسایشی نیشتیمانی ئەمریكا لەكۆبوونەوەی لەگەڵ سەرۆكوەزیران بارزانی، جەختیكردەوە " لەگەڵ سەرۆك جۆ بایدن، تاوتوێی ڕێكارەكانی پاراستنی ئارامیی هەرێم دەكات".

چیرۆكە سەرەكییەكە: ئەمڕۆ سێشەممە 16-1-2024  سەرۆكوەزیران بارزانی لە داڤۆس، لەگەڵ جەیك سولیڤان، ڕاوێژكاری ئاسایشی نیشتمانیی ئەمریكا كۆبووەوە.

بابەتی ستراتیژی: تەوەری سەرەكیی كۆبوونەوە تایبەت بوو بە هێرش و پەلاماردانی هەولێر و گرنگیی پاراستنی ئاسایش و سەقامگیریی هەرێمی كوردستان.

ڕاوێژكاری ئاسایشی نیشتمانیی ئەمریكا وێڕای دەربڕینی پشتیوانی بۆ هەرێمی كوردستان، جەختی كردەوە كە لەگەڵ سەرۆك جۆ بایدن، تاوتوێی ڕێكارەكانی پاراستنی ئارامیی هەرێم دەكات.

سەرۆكوەزیران بارزانی دووپاتی كردەوە كە بەردەوامبوونی هێرشەكان و بەئامانجگرتنی هاووڵاتییانی سڤیل، هیچ پاساوێك هەڵناگرێت و پێویستە كۆتایی پێ بهێنرێت.

باكگراوند:  كاتژمێر 11:30ـی شەوی ڕابردوو، سوپای پاسدارانی ئێران بە مووشەكی بالیستیكی هێرشی كردە سەر چەند شوێنێك لە هەولێر، بەهۆیەوە پێنج هاووڵاتی گیانیان لەدەستدا و شەشی دیكە برینداربوون، لەنێویاندا پێشڕەو دزەیی،  گەورە بازرگانی شاری هەولێر كە خاوەنی فالكۆن گروپ و ئیمپایەر، لە بۆردوومانەكەدا خۆی و هاوسەرەكەی گیانییان لەدەستدا.