ئەڵمانیا: لە ناردنی چەک بۆ ئیسرائیل بەردەوام دەبین

ئاڤا نیوز

ئەڵمانیا ڕایدەگەیێنێت کە لە ناردنی چەک بۆ ئیسرائیل بەردەوام دەبێت.

لێدوانی فەرمی: یوهان وادەفۆل، وەزیری دەرەوەی ئەڵمانیا، لە وەڵامی پرسیاری ئەندامانی پەرلەمانی وڵاتەکەی ڕایگەیاند، ئەڵمانیا درێژە دەدات بە پشتیوانیکردن لە دەوڵەتی ئیسرائیل و لەو چوارچێوەیەشدا لە ناردنی چەک بۆ ئەو وڵاتە بەردەوام دەبێت.

- سەرجەم ئەندامانی حکومەتە هاوپەیمانییەکەی ئەڵمانیا لە پشتیوانیکردنی ئیسرائیل کۆکن.

ئەوەی پێویستە بیزانیت: ئەم پشتیوانییەی حکومەتی ئەڵمانیا بۆ ئیسرائیل لە کاتێکدایە کە بە گوێرەی ڕاپرسییەکی دامەزراوەی 'ئینسا' 58%ـی ئەڵمانییەکان لەگەڵ ئەوەدان کە حکومەتی وڵاتەکەیان ناردنی چەک بۆ ئیسرائیل ڕابگرێت. هاوکات 22% پێچەوانەی ئەمە بیر دەکەنەوە و 19%ـیش بۆچوونی خۆیان دەرنەبڕیوە.

باکگراوند: ئیسرائیل لە ئۆکتۆبەری 2023ـەوە نزیکەی 55 هەزار فەلەستینی لە کەرتی غەززە کوشتووە. وڵاتانی ئەوروپا و ئەمریکا چەک و کەرەستەی سەربازی بۆ دابین دەکەن تا لە هێرشەکانی بۆ سەر کەرتی غەززە بەکاریان ببات. لەم ماوەیەدا ئەڵمانیا بە بەهای 485.1 ملیۆن یۆرۆ چەکی بۆ ئیسرائیل ناردووە.