مەزڵووم عەبدی: قۆناغێکی نوێ دەستپێدەکەین و پێکەوەژیان بەهێزتر دەکەین

ئاڤا نیوز

 

فەرماندەی گشتیی هێزەکانی سووریای دیموکرات (هەسەدە) پیرۆزبایی جەژنی قوربان لە خەڵکی سووریا و جیهانی ئیسلامی دەکات، دەشڵێت: قۆناغێکی نوێ دەستپێدەکات و تیایدا پێکەوەژیان بەهێزتر دەکەن.

 

وێنە گەورەکە: دۆخی سیاسی و ئابووریی ڕۆژئاوای کوردستان لەم جەژنەدا بەرەو باشتربوون چووە، بەتایبەتیش دوای پێکهێنانی یەک شاندی هاوبەشی کوردی بۆ دانوستان لەگەڵ دیمەشق، ئومێدەکان بۆ چارەسەری دەستووریی و درێژخایەنی پرسی کورد لە سووریا زیاتر بوون.

 

ڕاگەیێنراوی فەرمی: مەزڵووم عەبدی، فەرماندەی گشتی هێزەکانی سووریای دیموکرات (هەسەدە) لە پەیامێکدا کە لە هەژماری تایبەتی خۆی لە تۆڕی کۆمەڵایەتی ئێکس بڵاویکردووەتەوە، ئاماژەی بەوەشکردووە، پیرۆزبایی جەژنی قوربانی لە کەسوکاری شەهیدان، شەڕڤانانی هەسەدە، هەموو سوورییەکان و جیهانی ئیسلامی دەکات.

 

- فەرماندەی هەسەدە ئومێدیشی خواستووە ئاشتی لە هەموو سووریا بەقەرار ببێت و ئاوارەکانیش بۆ ناوچەکانی خۆیان بگەڕێننەوە، تا هەمووان پێکەوە سەردەمێکی نوێ دەستپێبکەن و پێکەوەژیانی هاوبەشیش تیایدا پتەوتر بکەن.