باخچەلی: پێویستە دەستووری کودەتاچییەکان لەناوببرێت

ئاڤا نیوز

دەوڵەت باخچەلی، سەرۆکی مەهەپە دەستووری ئێستای تورکیا بە دەستووری کودەتاچییەکان ناودەبات و دەڵێت" پێویستە ئەو دەستوورە لەناوببرێت، نووسینەوەی دەستوورێکی نوێ کە گوزارشت لە ئیرادەی گەل بکات، قبووڵ بکرێت".

چیرۆکی سەرەکی: باخچەلی بەبۆنەی جەژنی قوربانەوە پەیامی پیرۆزبایی بڵاوکردەوە و قسەی لەسەر چەند پرسێکی هەنووکەیی تورکیا کرد، یەکێک لەوان پرسی نووسینەوەی دەستوورێکی نوێ بۆ تورکیا بوو زۆرترین قسەی لەسەر دەکرێت.

بڵاوکراوەی فەرمی: باخچەلی نووسیویەتی، نووسینەوەی دەستوورێکی نوێ بۆ تورکیا گرنگە، دوای جەژن لە چوارچێوەی ئامادەکارییەکانی بۆ نووسینەوەی دەستوورێکی نوێ، پەرلەمانی تورکیا بەرپرسیارییەتیەکی گرنگی دەکەوێتە ئەستۆ، داواکارین کارکردن بۆ ئەو دەستوورە دەست پێبکات. پێویستە دەستووری کودەتاچییەکان لەناوببرێت، نووسینەوەی دەستوورێکی نوێ کە گوزارشت لە ئیرادەی گەل بکات، قبووڵ بکرێت.

سەرۆکی مەهەپە داوا دەکات، پارتە سیاسییەکان لە پەرلەمان بەگوێرەی یاسا و دەستوور گفتووگۆ لەسەر پرسەکە بکەن.

لەلایەکی دیکەوە: باخچەلی پرسی ئاشتی کورد و هەڵوەشاندنەوەی پەکەکەی بە هەنگاوێکی گرنگ بۆ داهاتووی تورکیا ناوبرد و گوتی: تورکیا پێویستی بە ئاشتی، ئارامی و سەقامگیری هەیە.