وادەی گەڕانەوەی حاجییانی کوردستان دیاری دەکرێت

ئاڤا نیوز

پڕۆسەی حەجی ئەمساڵ لە کۆتایی نزیک بووەتەوە، سەرۆکی شاندی حاجییانی کوردستان وادەی گەڕانەوەی حاجییان تایبەت بە ئاڤا ئاشکرا دەکات.

وێنە گەورەکە: ئەمساڵ پێنج هەزار و 136 کەس بۆ بەجێهێنانی فەریزەی حەج لە هەرێمی کوردستانەوە ڕوویان لە وڵاتی سعوودیە کردووە، هەزار و 646 حەجخواز بە ڕێگەی وشکانی و سێ هەزار و 490 حەجخواز بە ڕێگەی ئاسمانی گەشتییان کردووە.

لێدوانی فەرمی: شێخ نیاز ڕاغب نەقشبەندی، سەرۆکی شاندی حاجییانی کوردستان تایبەت بە ئاڤا میدیا وتی، بە شێوەی کاتی خشتەی گەڕانەوەی حاجییان دیاریکراوە و ئەگەر هیچ گۆڕانکارییەک ڕوونەدات ڕۆژی 12ـی ئەم مانگە یەکەم کاروانی حاجییانی هەرێمی کوردستان بە وشکانی بەرەو کوردستان بەڕێ دەکەون.

زانیاریی زیاتر: سەرۆکی شاندی حاجییانی هەرێمی کوردستان ئەوەش دەڵێت: لە دوو ڕۆژی داهاتوودا بەشێوەی کۆتایی بڕیار لەسەر خشتەی گەڕانەوەی حاجییان دەدرێت. سەبارەت بە ڕەوشی تەندروستی حاجییان دەڵێت: سەرجەمیان تەندروستییان باشە و هیچ گیان لەدەستدانێک تۆمار نەکراوە.

ئەوەی پێویستە بیزانیت: پڕۆسەی حەجی ئەمساڵ لە ڕۆژی 16ـی 5 دەستی پێکرد، سەرەتا بە ڕێگای وشکانی سەدان حەجخواز گەشتەکەیان دەستپێکرد.