لە قەڵادزێ دوو تۆمەتبار بە پارەی ساختەوە دەستگیر دەكرێن

ئاڤا نیوز

پۆلیسی نەهێشتنی تاوانی پشدەر، دوو كەس بە بڕێك پارەی ساختەوە دەستگیر دەكات کە لە دەرەوەی هەرێمی كوردستان پارەکەیان هێناوە و ویستویانە لە بازاڕ ساغی بکەنەوە.

بڵاوكراوەی فەرمی: بەڕێوەبەرایەتیی پۆلیسی ڕاپەڕین ڕایگەیاند: دوو تۆمەتبار بە ناوەكانی (ع.ح.ع) لەدایکبووی ساڵی 2008 (ع.ف.س) لەدایکبووی ساڵی 1995 لە ماركێتێك لە شاری قەڵادزێ  بە بڕێك پارەی ساختەوە دەستگیرکران، دوای لێکۆڵینەوە لەگەڵیاندا دانیان ناوە بە تاوانەکەیاندا و بە وتەی خۆیان پارەکەیان لە دەرەوەی هەرێمی كوردستان هێناوە و ویستویانە لە بازاڕ ساغی بکەنەوە.

ئەوەی پێویستە بیزانیت: ئەو پارەیەی کە دەستی بەسەرداگیراوە، بڕی یەك ملیۆن و 125 هەزار دیناری عێراقی لە جۆری 25 هەزاری و 700 دۆلاری ئەمریكیی ساختە  بووە و دوو تۆمەتبارەكە بە بڕیاری دادوەر بە ماددەی 281 لە یاسای سزادانی عێراقی ڕاگیراون و لێكۆڵینەوەی پۆلیس لەگەڵیان بەردەوامە.