شێخ دارا: بارانی ئەفریقی ڕوو لە هەرێمی کوردستان دەکات

ئاڤا نیوز

بەگوێرەی پێشبینییەکان، شەپۆلێکی بارانی ئەفریقی ڕوو لە هەرێمی کوردستان دەکات، ئەگەری خۆڵبارینیشی لەگەڵدا دەبێت.

لێدوانی فەرمی: شێخ دارا، شارەزا و پێشکەشکاری کەشوهەوای ئاڤا میدیا ڕایگەیاند، لە یەکشەممەی داهاتوو، شەپۆلێکی دیکەی باران لە وڵاتانی ئەفریقاوە ڕوو لە هەرێمی کوردستان و وڵاتانی ناوچەکە دەکات، بەڵام پلەکانی گەرمی بەرز دەبنەوە، بە تایبەت لە گەرمیان دەگاتە 20 پلەی سیلیزی.

ئەم شەپۆلەی بارانبارینە، خۆڵبارینێکی زۆری لەگەڵدایە و دەگاتە باشووری عێراق، بەڵام کاریگەرییەکەی کەمتر دەبێت لەسەر هەرێمی کوردستان. بای بەهێزیشی لەگەڵدا دەبێت.

زانیاریی زیاتر: شێخ دارا باس لەوەش دەکات، شەوی چوارشەممە لەسەر پێنجشەممە دیسان شەپۆلێکی دیکەی بارانبارین سەرتاسەری هەرێمی کوردستان دەگرێتەوە، ئەم شەپۆلە ئەگەری لافاویشی هەیە، لەگەڵ ئەوەشدا هەورە تریشقە و چەخماخەی لەگەڵدا دەبێت، بەهەمان شێوە تەرزەشی لەگەڵدا دەبێت.

لەلایەکی دیکەوە: بەگوتەی شێخ دارا، لە سنووری پارێزگای سلێمانی سێ شوێن زیاتر لە هەزار ملم بارانیان لێ باریوە، ئەوانیش پێنجوێن، بەرزنجە، قەرەداخـن.