ئەنجوومەنی وەزیرانی عێراق باجی زیاتر دەخاتە سەر قوتووی خواردنەوە گازییەکان

ئاڤا نیوز

 

ئەنجوومەنی وەزیرانی عێراق لە کۆبوونەوەی ئەمڕۆیدا بڕیاریدا، بە ڕێژەی 50% باجی گومرگی زیادە لەسەر قوتووی خواردنەوە گازییەکان و شەربەت و خواردنەوە وزەبەخشەکان بسەپێنێت.

 

وێنە گەورەکە: وەزارەتی دارایی عێراق لە بڕیارێکی ناڕەوا و ناشایستەدا بەر لە جەژنی قوربان مووچەی فەرمانبەرانی هەرێمی کوردستانی ڕاگرت و تاوەکو ئێستاش هیچ هەنگاوێکی بە ئاڕاستەی چارەسەرکردنی ئەو دۆخە نەناوە و تەنانەت لە کۆبوونەوەی ئەنجوومەنی وەزیرانی عێراقیشدا باسی ئەو پرسە نەکراوە، ئەمەش کاردانەوەی سیاسی بەرفروانی بەدوای خۆیدا هێناوە. 

 

چیرۆکی سەرەکی: ئەنجوومەنی وەزیرانی عێراق، ئەمڕۆ پێنجشەممە 12-6-2025 کۆبوونەوەی ئاسایی خۆی بەسەرۆکایەتی محەممەد شیاع سوودانی، ئەنجامدا و پێش بەڕێوەچوونی کۆبوونەوەکەش بە هیچ جۆرێک ئەجێنداکەی ئاشکرا نەکرا .

 

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق ڕایگەیاند: ئەنجوومەنی وەزیرانی عێراق بڕیاریدا، باجی گومرگی زیادە بەڕێژەی 20% لەسەر قوتووی خواردنەوە گازییەکان و شەربەت و خواردنەوە وزەبەخشەکان بسەپێنێت.

 

زانیاریی زیاتر: بەپێی ڕاگەیێنراوەکە، بریارەکەی ئەنجوومەنی وەزیرانی عێراق لە چوارچێوەی پاراستنی بەرهەمی ناوخۆییدا دێت و بڕیارەکەش بۆ ماوەی چوار ساڵ جێبەجێ دەکرێت، بێ ئەوەی باجی گومرگی زیاتر لەماوەی ئەو چوار ساڵە بسەپێندرێت.

 

ئەمەش بزانە: پێشتر بڕی 30% باجی گومرگی لەسەر قوتووی خواردنەوە گازییەکان و شەربەت و خواردنەوە وزەبەخشەکان سەپێنرابوو،  دوابەدوای ئەم بڕیارەش کۆی باجی سەپێندراو بەسەر ئەو قوتووانە دەگاتە 50% و کەمیش ناکریتەوە .