سوپای سووریا بنکەی سەربازیی تەنەف لە ئەمریکییەکان وەردەگرێتەوە

ئاڤا نیوز

وەزارەتی بەرگریی سووریا ڕایدەگەیێنێت، یەکەکانی سوپا بە هەماهەنگی لەگەڵ لایەنی ئەمریکی بنکەی سەربازیی تەنەفیان وەرگرتووەتەوە و دەستیان بە بڵاوبوونەوە لەسەر سنوورە هاوبەشەکانی عێراق و ئوردن کردووە.

ڕاگەیێنراوی فەرمی: بەگوێرەی ڕاگەیێنراوێکی وەزارەتی بەرگریی سووریا، یەکەکانی سوپای عەرەبی سووریا بنکەی تەنەف و دەوروبەریان بە تەواوی کۆنترۆڵ کردووە و لە ناوچە ستراتیژییە سنوورییەکاندا جێگیر بوون.

٠ ئەم هەنگاوە دوای هەماهەنگیی نێوان دیمەشق و واشنتن دێت، کە ئامانج لێی ڕادەستکردنی بنکەکە و جێگیرکردنی سوپای سووریایە لەسەر سنووری نێوان هەر سێ وڵاتەکە.

٠ هێزەکانی پاسەوانی سنووری سەر بە وەزارەتی بەرگری، لە چەند ڕۆژی داهاتوودا دەست بە جێبەجێکردنی ئەرکە نوێیەکانیان دەکەن و لە هەموو بیابانی تەنەف بڵاودەبنەوە.

ئەوەی پێویستە بیزانیت: دوێنێ چوارشەممە ڕوانگەی سووری بۆ مافەکانی مرۆڤ ڕایگەیاند، هێزەکانی هاوپەیمانی نێودەوڵەتی بە تەواوی لە بنکەی تەنەف کشانەوە و ناوچەکەیان ڕادەستی سوپای وڵاتەکە کرد تاوەکو ئەرکە سەربازییەکان لەو سێگۆشە سنوورییەدا جێبەجێ بکەن.