سەرەتای هەفتەی داهاتوو مووچەی مامۆستا و فەرمانبەرانی گرێبەست دابەش دەکرێت

ئاڤا نیوز

دوای کۆتایی هاتنی پرۆسەی دابەشکردنی مووچەی مووچەخۆرانی هەرێمی کوردستان، دەست بە دابەشکردنی مووچەی مامۆستا و فەرمانبەرانی گرێبەست دەکرێت و سەرەتای هەفتەی داهاتوو مووچەیان بۆ خەرج دەکرێت.

چیرۆکی سەرەکی: 37 هەزار و 933 مامۆستا لە وەزارەتی پەروەردە و چوار هەزار و 100 مامۆستای زانکۆ و پەیمانگەکانی سەر بە وەزارەتی خوێندنی باڵا و توێژینەوەی زانستی، لەپاڵ ژمارەیەک فەرمانبەری گرێبەستی دام و دەزگاکانی حکومەت، لەسەر داهاتی ناوخۆ مووچەیان دابین دەکرێت، مانگانە دوای دابەشکردنی مووچەی فەرمانبەران مووچەی ئەو توێژانەش دابەش دەکرێت.

لێدوانی فەرمی: سەرچاوەیەک لە وەزارەتی دارایی و ئابووری هەرێمی کوردستان بە ئاڤای گوت: مووچەی گرێبەستەکان دەکەوێتە هەفتەی داهاتوو، بەدیاریکراوی لەنێوان ڕۆژانی یەکشەممە یان دووشەممە دابەش دەکرێت.

باکگراوند: ڕۆژی سێشەممە وەزارەتی دارایی عێراق، 931 ملیار و 257 ملیۆن دیناری وەک مووچەی مانگی یەکی مووچەخۆرانی هەرێمی کوردستان خستەسەر هەژماری بانکیی وەزارەتی دارایی و ئابووریی هەرێمی کوردستان، ماوەی دوو ڕۆژە پرۆسەی دابەشکردنی مووچە بەردەوامە و ڕۆژی شەممە کۆتایی دێت.