جارێکی دیکە بەهای دینار بەرامبەر بە دۆلار دابەزی

ئاڤا نیوز

لەگەڵ کرانەوەی بازاری دراوەکان، جارێکی دیکە نرخی دراوەکان بەرزی و نزمی بەخۆیەوە بینی، بەهای دینار بەرامبەر دۆلار دابەزی و 100 دۆلار بە 151 هەزار و 500 دینار مامەڵەی پێوەدەکرێت، شارەزایانی ئابووریش چەندین هۆکاریی ناجێگیربوونی بەهای دینار دەخەنەڕوو. 

لێدوانی فەرمی:  د.مستەفا مەلا حەسەن، شارەزای ئابووری ئاڤا، دەڵێت: "لەم دۆخە ئەوەی دۆلاری هەیە کێشەی نیە، وە بەشێکی پارەکەی بە دینار بێت گونجاوترە بۆ ئەوەی لەکاتی پێویست بۆ پڕکردنەوەی پێداویستییەکانی سوودی لێ وەربگرێت، ئەوەشی دیناری هەیە و چاوەرێی هەرزان بوونی دۆلار دەکات، واباشترە لە هەر دابەزینێکی دۆلار کە دەیکات سوود وەربگرێت و کەم کەمە لەگەڵی بڕوات بۆ ئەوەی بتوانێت لەو دابەزینانە بەشێكی کەم لە دینارەکەی بکات بە دۆلار."

د.مستەفا، دەشڵێت: "بریاڕی پێناسی گومرگی، سیستەمی ئەسیکۆدا، پێدانی دۆلار بە بازرگانان و مانگرتنیان، بازاڕی دۆلاری بە ناجێگیری هێشتووەتەوە. لەلایەکی دیکەشەوە، تا حکومەتی عێراق پێکنەیەت، ئەم ناڕوونییە بەردەوام دەبێت، کەی سەرۆکوەزیرانی عێراق دیارکرا، کابینەی نوێ پێکهێنرا و سیاسەتی خۆی خستەڕوو، ئەوکات ئەودیوی تونێلەکە رووناک دەبێتەوە."

لەلایەکی دیکەوە: کەیفی خۆشناو، وتەبێژی ئەنجوومەنی بازاڕی ئاڵوگۆڕی دراوی هەولێر بە ئاڤای وت: "ئەمڕۆ خواست لەسەر کڕینی دۆلار زۆرە و نرخەکەی ناجێگیرە، بەهۆی سیستەمی ئەسیکۆدا، بازرگانەکان لە بازاڕدا دۆلاری زۆر دەکڕن، حەواڵەش گرانبووە، گرژییەکانی نێوان ئێران و ئەمریکاش کاریگەریی لەسەر ناجێگیری بازاڕەکە هەیە."

زانیاریی زیاتر: ئەمڕۆ، بەهای دینار لە بەرامبەر بە دۆلار جارێکی دیکە دابەزی و  100 دۆلار بە 151 هەزار و 500 دینار مامەڵەی پێوەدەکرێت. لە شارەکانیش بەم شێوەیەیە:

٠ لە هەولێر 100 دۆلار بەرامبەر بە 151 هەزار و 150 دینارە.

٠ لە سلێمانی 100 دۆلار بەرامبەر بە 151 هەزار 250 دینارە. 

٠ لە بەغدا 100 دۆلار بەرامبەر بە 151 هەزار 500 دینارە.