مەسرور بارزانی و باڵیۆزی ئەرمینیا لە عێراق جەخت لە برەودان بە پەیوەندییەکان دەکەنەوە

ئاڤا نیوز

سەرۆکوەزیران مەسرور بارزانی، پێشوازی لە باڵیۆزی ئەرمینیا لە عێراق کرد، لە دیدارێکدا گرنگیی برەودان بە پەیوەندییەکانی هەرێمی کوردستان و ئەرمینیا لە بوارە جۆراوجۆرەکاندا کرایەوە.

چیرۆکی سەرەکی: ئەمڕۆ پێنجشەممە، سەرۆکوەزیران، مەسرور بارزانی، پێشوازی لە ڕۆبین سۆگۆیان، باڵیۆزی ئەرمینیا لە عێراق کرد.

ڕاگەیێنراوی فەرمی: ماڵپەڕی حکومەتی هەرێمی کوردستان بڵاوی کردەوە، لە دیدارەکەدا جەخت لە گرنگیی برەودان بە پەیوەندییەکانی هەرێمی کوردستان و ئەرمینیا لە بوارە جۆراوجۆرەکاندا کرایەوە و ئاماژە بە کۆبوونەوە و دیدارەکانی سەرۆکوەزیران لەگەڵ سەرۆک و سەرۆکوەزیرانی ئەرمینیا لە پەراوێزی کۆڕبەندی ئابووریی جیهانی داڤۆس درا.

٠ باڵیۆزی ئەرمینیا پێزانینی وڵاتەکەی بۆ پاراستنی مافەکانی پێکهاتەی ئەرمەن لە هەرێمی کوردستان دەربڕی.

٠ بیروڕا لەبارەی چاکسازییەکانی حکومەتی هەرێمی کوردستان لە هەموو کەرتەکان لەپێناو بنیاتنانی ژێرخانێکی بەهێزی ئابووری، هەروەها دوایین گۆڕانکاری و پێشهاتەکانی دۆخی گشتیی عێراق و هەوڵ و گفتوگۆکانی هەڵبژاردنی سەرۆککۆمار و پێکهێنانی حکومەتی نوێی عێراق، ئاڵوگۆڕکرا.