بەڕێوەبەری بانکی ڕواندز مووچە بۆ چەند خانەنشینێکی پەککەوتە دەباتە ماڵەوە

ئاڤا نیوز

بەڕێوەبەری بانکی ڕواندز، بەهۆی ئەوەی بەشێک لە خانەنشین و خاوەن پێداویستییە تایبەتەکانی سنوورەکەی نەیانتوانیوە بڕۆن بۆ بانک و مووچەکانیان وەرگرن، خۆی و ستافێکی بانک یەک یەک چوونەتە ماڵەکان و مووچەیان پێداون.

وێنە گەورەکە: بەشێکی زۆری خانەنشینان بە هۆی ئەوەی هێشتا مووچەکانیان نەچووەتە سەر "هەژماری من"، لە بانکەکان وەری دەگرن؛ ژمارەیەکیان پەککەوتەن و لەسەر جێگە کەوتوون و ناتوانن بچنە بانکەکان، یان لە دەرەوەی وڵاتن و لە ڕێگەی بریکارەوە مووچەکانیان وەردەگرن، دەبێت ساڵانە جارێک کە ئەمەش لەسەرەتای ساڵ دەکرێت، خۆیان ئامادەبن و بۆ ئەوەی مووچەکانیان بەردەوام بێت.

زانیاریی زیاتر: بەگوێرەی خشتەی دابەشکردنی مووچەی وەزارەتی دارایی، ڕۆژی چوارشەممە مووچەی خانەنشینانی مەدەنی و پێشمەرگە دابەش کران، بەهۆی ئەوەی بەشێکی خانەنشینان پەککەوتەن و نەیانتوانیوە سەردانی بانک بکەن، هۆشمەند ڕەسوڵ، بەڕێوەبەری بانکی ڕواندز و ژمارەیەک فەرمانبەر، مووچەی چەند مووچەخۆرێكی خاوەن پێداویستی تایبەت و پەککەوتەی سنووری قەزاکەیان بۆ بردنە ماڵەوە.

ژمارەکان وادەڵێن: بۆ مووچەی مانگی یەک زیاتر لە 115 هەزار خانەنشین لە ڕێگەی "هەژماری من"ـەوە مووچە وەردەگرن؛ ئەو بەشەی کە دەمێنێتەوە، لە بانکەکانەوە مووچەکانیان وەردەگرن.