مووچەخۆرانی هەژماری من دەتوانن دوانیوەڕۆ مووچەکانیان ڕابکێشن

ئاڤا نیوز

پرۆسەی دابەشکردنی مووچەی مانگی یەک دەست پێ دەکات، بە سێ ڕۆژ مووچە دابەش دەکرێت، لە ڕۆژانی چوارشەممە، پێنجشەممە و شەممە، ئەوانەی لە هەژماری من مووچە وەردەگرن دوانیوەڕۆ دەتوانن سەردانی ئامێرەکانی (ATM) بکەن بۆ ڕاکێشانی مووچەکانیان.

وێنە گەورەکە: ڕۆژی سێشەممە وەزارەتی دارایی عێراق بڕی 931 ملیار و 257 ملیۆن دیناری بۆ مووچەی مانگی یەک ناردووە، دوای ئەوەی وەزارەتی دارایی هەرێمی کوردستان پارەکەی بەکاش لە لقی هەولێری بانکی ناوەندی وەرگرت، ڕێککارەکانی دابەشکردنی مووچە دەست پێ دەکەن.

زانیاریی ئاڤا: سەرچاوەیەک لە وەزارەتی دارایی و ئابووریی هەرێمی کوردستان بە ئاڤای گوت، "ئەو مووچەخۆرانەی لە ڕێگەی هەژماری من مووچە وەردەگرن، دوای ئەوەی نامەی ئاگادارکردنەوەکەیان پێگەیشت، دەتوانن دوانیوەڕۆ سەردانی ئەی تی ئێمەکان بکەن، مووچەکانیان ڕابکێشن، چونکە تا ئەو کاتە پارەکە ناگوازرێتەوە سەر هەژماری بانکەکانی هەژماری من."

- ئەمڕۆ ئەم توێژانە لە ڕێگەی هەژماری من مووچەکانیان وەردەگرن؛ وەزارەتی خوێندنی باڵا، وەزارەتی پەروەردە، وەزارەتی تەندروستی، خانەنشینان و کەسوکاری شەهیدان.


زانیاریی زیاتر: بە پشت بەستن بە دوایین ئامارەکان تا ئێستا زیاتر لە یەک ملیۆن فەرمانبەر و مووچەخۆر و سوودمەندان لە پرۆژەی 'هەژماری من' تۆمار کراون و بۆ مووچەی ئەم مانگە نزیکەی 700 هەزار مووچەخۆر لە ڕێگەی هەژماری من مووچە وەردەگرن.