وەزارەتی دارایی: بەغدا بۆ مووچەی مانگی یەک زیاتر لە 36 ملیار دیناری نەناردووە

ئاڤا نیوز

وەزارەتی دارایی کوردستان دەڵێت، بۆ مووچەی مانگی یەکی ئەمساڵ بڕی 36 ملیار و 360 ملیۆن و 864 هەزار دیناری لە کۆی تەمویلی مووچە نەناردووە کە شایستەی چەند مانگی ڕابردووی زیاتر لە هەشت هەزار خانەنشینی سەربازی و شارستانییە کە لە ساڵی ڕابردوودا خانەنشین کراون.

وێنە گەورەکە: دوا نیوەڕۆی ئەمڕۆ سێشەممە ڕۆژی 10-2-2026، بڕی 931 ملیار و 257 ملیۆن دینار وەک تەمویلی مووچەی مانگی یەکی فەرمانبەران و مووچەخۆرانی هەرێمی کوردستان خرایە سەر هەژماری بانکی وەزارەتی دارایی و ئابووریی هەرێمی کوردستان لە لقی هەولێری بانکی ناوەندیی عێراق.

بڵاوکراوەی فەرمی: وەزارەتی دارایی و ئابووریی هەرێمی کوردستان ڕایگەیاند؛ لە چوارچێوەی ئەو سیاسەتەی ماوەی چەند ساڵێکە حکومەتی فیدراڵ لە دژی هەرێمی کوردستان پەیڕەوی دەکات، هاوکات ئەو کێشە و گیروگرفت و بیانوانەی مانگانە وەزارەتی دارایی حکومەتی فیدراڵ بۆ مووچەی هەرێمی کوردستان دروستی دەکات، بۆ مووچەی مانگی یەکی ئەمساڵ بڕی 36 ملیار و 360 ملیۆن و 864 هەزار دیناری لە کۆی تەمویلی مووچە نەناردووە.

ئەوەی پێویستە بیزانیت: بەگوێرەی ڕاگەیێنراوەکەی وەزارەتی دارایی، ئەو بڕە پارەیەی کە نەنێردراوە، بریتییە لە؛ شایستەی چەند مانگی ڕابردووی زیاتر لە هەشت هەزار خانەنشینی سەربازی و شارستانی کە لە ساڵی ڕابردوودا خانەنشین کراون، دوای ئەوەی پەسەندکران و لە مانگی یەک داخلی لیستی مووچە کراونەتەوە.

- پێویست بوو ئەو خانەنشینانە چەند مووچەیەک پێکەوە وەربگرن، کەچی لە بەغداوە تەنها یەک مووچەیان بۆ هاتووە کە مووچەی مانگی یەکی ئەمساڵە.

هەنگاوی داهاتوو: وەزارەتی دارایی دەڵێت، لەبارەی ئەم بابەتە تیمەکانمان لەسەر هێڵن و لەگەڵ وەزارەتی دارایی عێراق لە پەیوەندیی بەردەوامدان بۆ چارەسەرکردنی کێشەکە و خەرجکردنەوەی ئەو شایستانە لە نزیکترین کاتدا.