گەنجێکی کوەیتی بۆ بینینی سرووشتی کوردستان هەفتەیەکە لە ناو خێمەدا ڕۆژ دەکاتەوە

ئاڤا نیوز

عەلی حەیدەر، گەنجێکی گەڕۆکی کوەیتییە، بە ئۆتۆمبێلەکەی مەودایەکی زۆری بڕیوە تا بگاتە چیاکانی کوردستان و هەفتەیەکە لە شاری دهۆکە، بەهۆی ئارامی و میواندۆستی ئەو شارە حەوتەم جارە سەردانی کوردستان دەکات. 

چیرۆکی سەرەکی: ماوەی هەفتەیەکە گەنجێکی کوەیتی بەناوی عەلی حەیدەر، لە دهۆکە و بۆ گەشت و سەیران بە ئۆتۆمبێلەکەی خۆی هاتووە بۆ کوردستان. هەرچەندە خۆی لە نێو خێمە دەمێنێتەوە بەڵام گەنجێکی دهۆکی داوای لێ دەکات لە ماڵەکەی ئەودا بمێنێتەوە. 

لێدوانی فەرمی: عەلی حەیدەر، قسەی بۆ ڕۆژهات لوقمان، پەیامنێری ئاڤا بادینان کرد و باس لە ئەزموونێکی جیاواز دەکات کە وەک خۆی دەڵێت: "من ناڵێم کوردستان وەک ئەوروپایە، چونکە کوردستان تایبەتمەندی و جوانیی خۆی هەیە، بەهیچ شوێنێکی تر ناچێت لە هیچ وڵاتێکی دیکەی جیهانم نەیبینیوە.

ئەو گەنجە کوەیتیە، چیرۆکێکی سەرنجڕاکێش بۆ پەیامنێری ئاڤا دەگێڕێتەوە و دەڵێت: "شەوێک لەناو خێوەتەکەی خۆمدا خەریکی پشوودان بووم، گەنجێکی دهۆکی هاتە لام و پێداگیریی کرد و داوای لێکردم "کە نابێت لەوێ بمێنمەوە و دەبێت بێیت بۆ ماڵمان، نان بخۆیت، خۆت بشۆیت و پشوو بدەیت." عەلی دەڵێت: "ئەم ڕوحیەتە گەورەیەی کورد بۆ ئەو زۆر جێی سەرنج و دڵخۆشی بووە."

٠ لێرە ئارامی و ئاوەدانیی دەبینم، لە شوێنانی تر دەست ناکەوێت.

لەلایەکی دیکەوە: گەنجە کوەیتیەکە، داوا لە هەمووان دەکات بێن و کوردستان ببینن و دەڵێت: "ئەوەی نەهاتووە، نازانێت ئەم وڵاتە چەندە جوانە، بۆیە با بێن و لە نزیکەوە ئەم هەموو میواندۆستی و جوانییە ببینن."

زانیاریی زیاتر: عەلی، لە پێنج ساڵی ڕابردوودا گەشتی بۆ ڕووسیا، جۆرجیا، تورکیا، وڵاتانی کەنداو و ئەوروپا کردووە، ئەمە حەوتەم جارە عەلی حەیدەر سەردانی دهۆک دەکات. ئێستا هاوڕێی زۆرە و پێی وایە هەرچی مرۆڤ بیەوێت، لە ئاوەدانی، ئارامی و دڵسۆزی لەم شارەدا دەستی دەکەوێت.

ئەمەش بزانە: چیرۆکی عەلی حەیدەر سەلمێنەری ئەو ڕاستییەیە کە سەرمایەی ڕاستەقینەی کوردستان تەنیا سروشتەکەی نییە، بەڵکو دڵگەورەیی و ڕووی خۆشی خەڵکەکەیەتی کە سەرنجی گەشتیارانی جیهان ڕادەکێشێت.