پارێزگاری بانکی ناوەندیی عێراق بۆ ئاڤا: بێخەم بن نرخی دۆلار بەرز نابێتەوە

ئاڤا نیوز

پارێزگاری بانکی ناوەندیی عێراق دڵنیایی دەدات و دەڵێت، بەهای دۆلار بەرامبەر دینار بەرزنابێتەوە. پەیوەست بەو هەواڵانەی کە ئەمریکا ناردنی دۆلار بۆ عێراق ڕادەگرێت، گوتی، "شتی وا ڕوونادات".

چیرۆکی سەرەکی: عەلی عەلاق، پارێزگاری بانکی ناوەندی عێراق، یەکێکە لە کەسایەتییە هەرە کاریگەرەکان لەسەر ئابووری عێراق و کلیلی بڕیارە داراییەکان و سەقامگیرکردنی بەهای دیناری بەدەستە بەرامبەر دۆلار، ئەمرۆ سێشەممە چاوپێکەوتنێکی تایبەتی لەگەڵ ئاڤا میدیا ئەنجام دا.

لێدوانی فەرمی: عەلی عەلاق دڵنیایی دا کە هیچ مەترسییەک لەسەر نرخی دۆلار نییە و گوتی: گەرەنتی دەدەم نرخی دۆلار بەرز نابێتەوە. پارەی یەدەگ و زێڕ و دراوی بیانی یەدەگمان زۆرە، دۆخی دارایی وڵات جێگیرە، پێویست ناکات خەڵک لە گۆڕانی نرخی دۆلار بترسن. دەشڵێ: هیچ کێشەیەک لە ئارادا نییە و بڕێکی زۆر باش دۆلار لەبەردەست بانکەکانە.

- دەبێ بانکی ناوەندی بڕیار لەسەر نرخی دراو بدات نەک بازاڕ، گۆڕینی نرخی دراو لەم کاتەدا مەترسیدارە و دەبێتە هۆی هەڵاوسان، بۆیە هیچ پلانێک بۆ گۆڕینی بەهای دینار بەرامبەر دۆلار نییە.

ئەوەی پێویستە بیزانیت: لەبارەی ئەو هەواڵانەشی باس لەوە دەکەن ئەمریکا ناردنی دۆلار بۆ عێراق ڕادەگرێت، عەلی عەلاق بە کورتی وەڵامی دایەوە و گوتی: ئەو قسانە چەندین جار کراون، بەڵام قەت ڕوویان نەداوە و ڕووش نادەن. داواش لە خەڵک دەکات متمانەیان بە بانکی ناوەندی هەبێت و نەکەونە ژێر کاریگەریی پروپاگەندەی بازاڕ.

لەلایەکی دیکە: د.مستەفا مەلا حەسەن پرسیاری زێڕیشی لێ دەکات، عەلی عەلاق دەڵێت: هەوڵ دەدەین بەگوێرەی ستانداردە نێودەوڵەتییەکان یەدەگەکە زیاد بکەین، بەڵام زۆر بەوریاییەوە مامەڵە لەگەڵ زێڕ دەکەین، چونکە نرخەکەی زۆر بەرز بووەتەوە.