قایمقامیەتی سلێمانی هۆکاری داخستنی کولێرە بە قیمەی میری سۆران ئاشکرا دەکات

ئاڤا نیوز

لە شاری سلێمانی دوکانێکی بەناوبانگی فرۆشتنی کولێرە بەقیمە لەلایەن لیژنەکانی قایمقامیەت دادەخرێت، بە بیانووی هەبوونی گۆشتی بەستوو، خاوەنەکەشی ئەو تۆمەتانە ڕەت دەکاتەوە. 

چیرۆکی سەرەکی: لەگەڵ داخستنی دوکانی 'کولێرە بە قیمەی میری سۆران' لە سلێمانی، سۆشیال میدیای تەنی و کاردانەوەی لێ کەوتەوە، قایمقامیەتی سلێمانی هۆکارەکەی بۆ فێڵکردن لە کڕیارەکان دەگەڕێنێتەوە، بەڵام خاوەنی دوکانەکە دەڵێت: "تەحەدا دەکەم فێڵم کردبێت."

ڕاگەیێنراوی فەرمی: قایمقامیەتی سلێمانی لە ڕاگەیێندراوێکی فەرمیدا هۆکاری داخستنی شوێنەکەیان بۆ سێ هۆکار گەڕاندووەتەوە لەوانە: 

٠ دەستبەسەرداگرتنی 50 کیلۆگرام قیمەی بەستوو کە سەرچاوەکەی نادیار بووە.

٠ فرۆشتنی کولێرەکان بە نرخی گۆشتی فرێش" لە کاتێکدا گۆشتی بەستوو بەکارهاتووە، ئەمە فێڵکردنە لە کڕیار.

٠ لەناوبردنی 12کیلۆگرام پیازی کۆن و خراپبوو.

لێدوانی لایەنی بەرامبەر: سۆران ساڵح خاوەنی 'کولێرە بەقیمەی میری سۆران' وەڵامی تۆمەتەکان دەداتەوەو دەڵێت: "ئەو ڕۆژە قەسابەکە گۆشتی فرێشی هێنا، بەڵام لە پەلەپەلیدا وەسڵەکەم لە بیر چوو بوو، لیژنەکان هاتن و بەو بیانووە دوکانەکەیان داخستم."

سۆران ساڵح دەشڵێت: "تەنانەت قەسابەکەشم برد بۆ لایان و شایەتی دا کە گۆشتەکە فرێشە، بەڵام گوێیان نەگرت. وتیشی: تەحدا دەکەم بۆ یەکجاریش قیمەی بەستووم بەکارنەهێناوە، ئەگەر وانەبوو با دوکانەکەم بۆ هەمیشە دابخەن.

ئەوەی پێویستە بیزانیت: بەگوتەی سۆران ساڵح، خاونی کولێرە بە قیمەی میری سۆران، قایمقامیەت پێیان وتووە، هەڵە تێگەیشتن بووە و دەتوانێت دوکانەکەی بکاتەوە.