ئەنجوومەنی وەزیرانی هەرێمی کوردستان لەسەر سێ پرس کۆ دەبێتەوە

ئاڤا نیوز

ئەمڕۆ ئەنجوومەنی وەزیرانی هەرێمی کوردستان لەسەر "پرسی بەشە بودجەی هەرێمی کوردستان، گواستنەوەی دۆسیەی زیندانیانی سیاسی بۆ دەزگای زیندانییانی سیاسیی عێراق و پرسی بەشەخۆراکی مانگانەی هاوولاتییان" کۆ دەبێتەوە.

بڵاوکراوەی فەرمی: فەرمانگەی میدیا و زانیاری بڵاوی کردووەتەوە، ئەمڕۆ چوارشەممە، 11-2- 2026، بە سەرپەرشتیی سەرۆکوەزیران، مەسرور بارزانی، ئەنجوومەنی وەزیرانی هەرێمی کوردستان کۆ دەبێتەوە.

- لە کۆبوونەوەی ئەمڕۆی ئەنجوومەنی وەزیران سێ تەوەری سەرەکی لە خۆگرتووە کە ئەمانەن:

تەوەری یەکەم: بابەتی سەرژمێریی دانیشتووانی عێراق کە لە ڕۆژانی 20 و 21ی تشرینی دووەمی ساڵی 2024 ئەنجام درا و بەگوێرەی ڕاگەیاندراوی فەرمیی ئەنجامی سەرژمێرییەکە، ڕێژەی دانیشتووانی هەرێمی کوردستان (جگە لە ناوچە کوردستانییەکانی دەرەوەی هەرێم) بەفەرمی بە ڕێژەی 14.1% دەستنیشان کرا، بەدواداچوونی ئەنجوومەنی وەزیران بۆ پابەندکردنی حکومەتی فیدراڵی بە ئەنجامی سەرژمێرییەکە بۆ مەبەستی دەستنیشانکردنی بەشەبودجەی هەرێمی کوردستان، ئەمە سەرەڕای جەختکردنەوەی حکومەتی هەرێمی کوردستان لەسەر جێبەجێکردنی ڕێککەوتنامەی پێشوەختەی نێوان هەردوو حکومەت بەگوێرەی بڕیارەکانی ئەنجومەنی وەزیرانی فیدراڵ.

- تەوەرى دووەم: پەسەندکردنی کۆنووسی هاوبەشی نێوان وەزارەتی کاروباری شەهیدان و ئەنفالکراوان و دەزگای زیندانییانی سیاسیی عێراق لە ڕێککەوتی 27ی تشرینی دووەمی 2025 کە لەنێوان هەردوولا ئیمزا کرا لەبەر ڕۆشنایی ڕەزامەندیی سەرۆکایەتیی ئەنجوومەنی وەزیران بە نووسراوی ژمارە 5423 لە 12ی تشرینی دووەمی 2024 تایبەت بە یەکخستن و گواستنەوەی دۆسیەی زیندانیان و گیراوانی سیاسی لە هەرێمی کوردستان بۆ دەزگای زیندانییانی سیاسیی عێراق.

تەوەرى سێیەم: بڕیاردان لەسەر پێشنیازی وەزارەتی بازرگانی و پیشەسازیی تایبەت بە پارەی بەشەخۆراکی مانگانەی هاووڵاتیان کە لەلایەن وەزارەتی بازرگانیی فیدراڵییەوە دابین دەکرێت، لە چوارچێوەی خەرجیی "النفقات الحاکمة" و چارەسەرکردنی پارەی کەڵەکەبووی پێشوو بۆ ساڵانی 2004-2022 گفتوگۆ دەکرێت.