تڕەمپ بژاردەی دەستبەسەرداگرتنی تانکەرە نەوتییەکانی ئێران تاوتوێ دەکات

ئاڤا نیوز

ڕۆژنامەی وۆڵ ستریت جۆرناڵ دەڵێت، ئیدارەی تڕەمپ تاوتوێی بڕیارێکی مەترسیدار دەکات بۆ دەستبەسەرداگرتنی ئەو تانکەرانەی نەوتی ئێران دەگوازنەوە.

هۆکارە زانراوەکان: بەگوێرەی ڕۆژنامە ئەمریکییەکە تڕەمپ دەیەوێت ئەم فشارە ئابوورییە بەکاربهێنێت تاوەکوو ئێران ناچار بکات نەک تەنیا لەسەر بەرنامەی ئەتۆمی، بەڵکو لەسەر موشەکە بالیستییەکانی و پشتگیریکردنی گرووپە چەکدارەکانی ناوچەکەش ڕێککەوتن بکات.

ئەوەی لەبارەیەوە دەگوترێت: بەرپرسانی ئەمریکا دەڵێن هەرچەندە ئەم هەنگاوە سەرچاوەی سەرەکیی داهاتی دەسەڵاتی ئێران وشک دەکات، بەڵام چەند بەربەستێکی گەورە لە پێشە وەک ترسی ئەوە هەیە تاران وەک کاردانەوە دەست بەسەر تانکەرە نەوتییەکانی هاوپەیمانانی ئەمریکا لە ناوچەکەدا بگرێت.

- ڕۆژنامەی باسی ئەوە دەکات کە ئەگەری ئەوە هەیە ئێران گەرووی هورمز مینڕێژ بکات، کە 25%ـی نەوتی جیهانی پێدا تێدەپەڕێت.

کاریگەری و لێکەوتەکان: هەر گرژییەک لەم ناوچەیەدا دەبێتە هۆی بەرزبوونەوەی کتوپڕی نرخی نەوت لە بازاڕەکانی جیهان، ئەمەش کاریگەریی خراپی لەسەر ئابووریی ئەمریکا دەبێت.

ئەمەش بزانە: لە مانگی کانوونی یەکەمی ڕابردووەوە، ئەمریکا گەمارۆیەکی توندی خستووەتە سەر تانکەرە نەوتییەکانی سەر بە ڤەنزوێلا و ئێستا دەیەوێت هەمان پلان بۆ ئێران جێبەجێ بکات.

ئەم هەوڵانەی تڕەمپ لە کاتێکدایە کە ئێران لە ناوخۆدا بەهۆی دابەزینی بەهای تمەن و خراپیی بژێویی خەڵک، ڕووبەڕووی ناڕەزایەتییەکی زۆر بووەتەوە.