کیم جۆنگ ئوون کچەکەی وەک جێنشینی خۆی دیاری دەکات

ئاڤا نیوز

سەرۆکی کۆریای باکوور جێنشینی خۆی دەستنیشان دەکات و سەرچاوەکانی کۆریای باشوور دەڵێن: کچەکەی دەبێتە جێگرەوەی.

زانیاریی بەدەستهاتوو: بەپێی زانیارییەکانی دەزگای هەواڵگریی کۆریای باشوور، کیم جۆنگ ئوون، ڕێبەری کۆریای باکوور، کیم جو ئەی، کچە مێردمنداڵەکەی خۆی وەکو جێنشینی داهاتووی وڵات دیاری کردووە، ئەو زانیارییەش لە کۆبوونەوەیەکی پەرلەمانتێرێکی کۆریای باشوورەوە لەگەڵ دەزگای هەواڵگریی وڵاتەکە ئاماژەی پێدراوە.

- هەواڵگریی سیئۆل ئاماژە بەوە دەکات کە کیم جو ئەی، بە فەرمی وەک جێنشین نیشان دەدرێت، ئەمەش بەهۆی دەرکەوتنە بەردەوام و دیارەکانی لە تەنیشت باوکی لە بۆنە فەرمییەکاندا.

- یەکێک لە ئاماژە هەرە بەهێزەکان، بڵاوبوونەوەی وێنەکانی "جو ئەی" بوو لە مانگی کانوونی دووەمی ئەمساڵدا، کاتێک لەگەڵ باوکی سەردانی کۆشکی "کومسوسان"یان کرد بۆ نواندنی ڕێز بەرامبەر تەرمی مۆمیاکراوی کیم ئیل سۆنگ و کیم جۆنگ ئیل.

ئەوەی پێویستە بیزانیت: میدیاکانی کۆریای باکوور ئێستا وشەی "هیانگدۆ" (ڕێبەر یان ڕێ نیشاندەر) بۆ کچەکەی کیم جۆنگ ئون بەکاردەهێنن، کە دەستەواژەیەکە تەنیا بۆ سەرۆکە باڵاکان و جێنشینەکانیان تەرخان کراوە.

ئەوەی پێشبینی دەکرێت: بڕیارە لە کۆتایی ئەم مانگە، کۆنگرەیەکی مێژوویی پارتی دەسەڵاتدار بەڕێوەبچێت کە گەورەترین ڕووداوی سیاسی وڵاتەکەیە، شیکەرەوەکان پێشبینی دەکەن لەم کۆنگرەیەدا کیم جو ئەی وەکو سکرتێری یەکەمی کۆمیتەی ناوەندی پارتی کرێکارانی کۆریای باکوور هەڵببژێردرێت، کە دووەم بەهێزترین پۆستە لە وڵاتەکەدا.

زانیاریی زیاتر: دەزگای هەواڵگریی کۆریای باشوور، زانیاری تەواوی لەسەر کچەکەی کیم جۆنگ ئوون نییە، بەڵام ئاماژەی بەوە داوە کە کچەکەی تەمەنی لە نێوان 13 بۆ 14 ساڵە و منداڵی گەورەی ڕێبەری کۆریای باکوورە.