زیاتر لە 150 هاونیشتمانیی كورد لە فڕۆكەخانەی ئیستەنبووڵ گیردەخۆن

ئاڤا نیوز

 

بەهۆی هێرشی ئیسرائیل بۆ سەر ئێران و كاردانەوەكانی هێرشەكە، گەشتە ئاسمانییەكان لە چەند وڵاتێكی ناوچەكە وەستاون و زیاتر لە 150 هاونیشتمانیی هەرێمی كوردستان لە فڕۆكەخانەی ئیستەنبووڵ گیردەخۆن و ناتوانن بگەڕێنەوە هەرێمی كوردستان.

 

چیرۆکی سەرەکی: بەرەبەیانی ئەمڕۆ هەینی ئیسرائیل هێرشێکی بەرفراوانی کرد سەر دامەزراوە ئەتۆمییەکانی ئێران و ماڵی چەندین سەرکردەی سوپای پاسدارانیشی بە ئامانج گرت کە بەهۆیەوە حوسێن سەلامی، فەرماندەی گشتیی سوپای پاسداران و جەنەراڵ غوڵام عەلی رەشید، فەرماندە قەرارگای ناوەندیی خاتەمول ئەمبیا، د.محەممەد مەهدی تهرانچی، سەرۆکی زانکۆی ئازاد و  د.فەرەیدوون عەباسی، سەرۆکی پێشووتری رێکخراوی وزەی ئەتۆمی ئێران، عەلی شەمخانی، ڕاوێژکاری باڵای خامنەیی و شەش زانای ئەتۆمی ئەو وڵاتە کوژراون. 

لێدوانی فەرمی: مستەفا فارس، هاووڵاتییەكی دانیشتووی هەرێمی كوردستانە و لەنێو فڕۆكەخانەی گەورەی ئیستەنبووڵەوە بە ئاڤا میدیای ڕاگەیاند: وا بڕیار بوو كاتژمێر (4:00)ی بەرەبەیانی ئەمڕۆ لەڕێگەی فڕۆكەیەكەوە و لە ئیستەنبووڵەوە بەرەو هەولێر بەڕێكەوین بەڵام گەشتەكە ڕەتكرایەوە، هەروەها فڕۆكەیەكی دیكەش كە تا ئاسمانی هەرێمی كوردستانیش ڕۆیشتبوو بەهۆی نالەباریی دۆخەكەوە گەڕایەوە فڕۆكەخانە ئیستەنبووڵ.

 

زانیاریی زیاتر: ئێستا 150 هاونیشتمانیی كورد لە فڕۆكەخانەی ئیستەنبووڵ گیریان خواردووە و كۆمپانیای توركش ئێرڵاین پێی ڕاگەیاندوون كە تاوەكوو 48 كاتژمێری داهاتوو سەرجەم گەشتەكان وەستێندراون.

 

ئەوەی پێویستە بیزانیت: گرفتی زیاتر لە 100 كەس لەو هاونیشتمانییە كوردانە ئەوەیە كە  لە وڵاتانی دیكەوە بەشێوەی ترانزێت چوونەتە ئیستەنبووڵ بۆ ئەوەی لەوێیوە بگەڕێنەوە هەرێمی كوردستان و ڤیزای توركیایان نییە بەو هۆیەوە ناتوانن لە فڕۆكەخانەی ئیستەنبووڵ بچنە دەرەوە و لەنێو فڕۆكەخانەكە گیریان خواردووە.