سەرجەم حاجیانی هەرێمی كوردستان و عێراق بە ڕێگای وشكانی دەگەڕێنەوە

ئاڤا نیوز

 

دەستەی باڵای حەج و عومرەی عێراق و بەڕێوەبەرایەتیی گشتیی حەج و عومرەی هەرێمی كوردستان بڕیار دەدەن بە هۆی وەستانی گەشتە ئاسمانییەكان، سەرجەم حاجیان بە ڕێگای وشكانی لە سعوودیەوە بگەڕێنەوە.

بڵاوكراوەی فەرمی: دەستەی باڵای حەج و عومرەی عێڕاق ڕایگەیاند: بە هۆی ئەو بارودۆخە نەخوازراوەی کە بەسەر ناوچەکەدا هاتووە و ڕاگرتنی گەشتە ئاسمانییەکان بۆ عێراق، سەرجەم حاجیان بە ڕێگای وشکانی دەگەڕێندرێنەوە بۆ وڵات.

زانیاریی زیاتر: دەستەكە ڕێوشوێنی بەپەلەی گرتووەتە بەر بۆ دابینکردنی پاس بۆ گواستنەوەی حاجیان بۆ دەروازەی سنووریی عەرعەر و پاشان گواستنەوەیان بۆ پارێزگاکانی خۆیان.

لەلایەكی دیكەوە: نەبەز ئیسماعیل، گوتەبێژی وەزارەتی ئەوقاف و كاروباری ئایینی حكومەتی هەرێمی كوردستان ڕایگەیاند: بڕیار درا سەرجەم حاجیانی عێراق بە ڕێگەی وشكانی بگەڕێندرێنەوە شارەکانیان، ئەمشەو پرۆسەکە دەستپێدەکات.