نەتانیاهۆ: پێشبینی چەند هێرشێکی تووندی ئێران دەكەین

ڕۆژهەڵاتی ناوەڕاست
13 حوزەیران

شەیری بکە لە:

نەتانیاهۆ: پێشبینی چەند هێرشێکی تووندی ئێران دەكەین

بنیامین ناتانیاهۆ، سەرۆكوەزیرانی ئیسرائیل

ئاڤا نیوز

سەرۆکوەزیرانی ئیسرائیل پێشبینی دەكات ئێران بە زنجیرەیەك هێرشی تووند وەڵامی هێرشەكانی ئەمڕۆی وڵاتەكەی بداتەوە، ئامادەیی وڵاتەکەیشی بۆ وەڵامدانەوەی هێرشەکان دەردەبڕێت.

وێنە گەورەکە: مەترسی هەیە جەنگی ئیسرائیل و ئێران فراوان بێت و درێژە بکێشێت، ئێران لەسەر ئاستی باڵا هەڕەشە دەکات وەڵامی تووندی هێرشەکانی ئەمڕۆی ئیسرائیل دەداتەوە کە 16 کاتژمێرە دەستیپێکردووە و تاوەکو ئێستا بەردەوامە.

لێدوانی فەرمی: دوای هێرشە فراوانەكەی ئەمڕۆی ئیسرائیل بۆ سەر ئێران، بنیامین ناتانیاهۆ، سەرۆكوەزیرانی ئیسرائیل وتارێكی پێشکەش کرد و هێرشەكانی ئەمڕۆی وڵاتەكەی بۆ سەر ئێران بە سەركەوتوو وەسف كرد. ئامادەیی وڵاتەكەیشی بۆ هەموو جۆرە وەڵامدانەوەیەك دەربڕی.

نەتانیاهۆ ئاشکرای کرد پێشتر ئەمریكایان لە پلانەکە ئاگادار کردووەتەوە، دوای هێرشەکانیش چاوەڕوانی هەڵوێستی ئەمریكا و دۆناڵد ترەمپین، "ئەو لە بڕیاردان سەربەخۆ و سەربەستە." جەختیش دەکاتەوە ئێران بەهیچ شێوەیەك ڕێگەی پێنادرێت ببێتە خاوەنی چەكی ئەتۆمی و ناكرێت بواری پێ بدرێت لە پیتاندنی یۆرانیۆم دەستكراوە بێت.

سەرۆکوەزیرانی ئیسرائیل ڕاشیگەیاند: دوای کوشتنی حەسەن نەسروڵڵا، ئێران بەرەو دروستکردنی بۆمبی ئەتۆمی هەنگاوی دەنا و مووشەکەکانی ئێران هەڕەشە بوون بۆ سەر مانەوەی ئیسرائیل، جگە لە هێرشکردنە سەر ئێران، هیچ بژاردەیەکی دیکەمان نەبوو، مافی خۆمانە بەرگری لە خۆمان بکەین.

باکگراوند: بەرەبەیانی ئەمرۆ سوپای ئیسرائیل بە 200 فڕۆکەی جەنگی هێرشێکی بەرفراوانی کردە سەر ئێران، زیاتر لە 100 پێگەی سەربازی و ئەتۆمی ئێران بە زیاتر لە 300 جۆر بۆمب بۆردوومان کران.

لە هێرشەکەدا بارەگای ناوەندی هێزە چەکدارەکانی ئێران لە تاران بۆردوومان کرا، جیا لەوەش ماڵی چەندین بەرپرس و زانای ئەتۆمی کرایە ئامانج.

بەپێی میدیا فەرمییەكانی ئێران تاوەکو ئێستا 78 كەس كوژراون و 329 كەسی دیكەش بریندار بوون، لەنێویاندا ژمارەیەکیان فەرماندەی باڵای سەربازی و زانای ئەتۆمین، ژمارەیەکیشیان چارەنووسیان نادیارە.