وەزارەتی ناوخۆ گرفتی مانەوەی هاونیشتمانیان لە ئیستەنبووڵ چارەسەر دەکات

ئاڤا نیوز

 

دوای گرژییەکانی نێوان ئیسرائیل و ئێران هاوکات وەستانی گەشتە ئاسمانییەکان لە دوێنێ هەینییەوە ژمارەیەک هاونیشتمانیی هەرێمی كوردستان لە فڕۆكەخانەی ئیستەنبووڵ گیردەخۆن، وەزارەتی ناوخۆی هەرێمی کوردستان کێشەکەیان چارەسەر دەکات.

 
چیرۆکی سەرەکی: بەهۆی هێرشی ئیسرائیل بۆ سەر ئێران و كاردانەوەكانی هێرشەكە، گەشتە ئاسمانییەكان لە چەند وڵاتێكی ناوچەكە وەستاون و زیاتر لە 150 هاونیشتمانیی هەرێمی كوردستان لە دوێی هەینییەوە لە فڕۆكەخانەی ئیستەنبووڵ گیردەخۆن و ناتوانن بگەڕێنەوە، دوای هەوڵی وەزارەتی ناوخۆی هەرێمی کوردستان کێشەی ئەوە گەشتیارانە چارەسەر کرا و فرۆکەیەکی تایبەتیان بۆ دابینکراوە بۆ ئەوەی بگەڕێنرێنەوە. 

 

لێدوانی فەرمی: ئیسماعێل محەممەد، یەکێک لەو گەشتیارانەیە و بە ئاڤای ڕاگەیاند، سوپاسی کەناڵی ئاڤا دەکەین دەنگی ئێمەیان گەیاند، دواتر سوپاسی وەزارەتی ناوخۆی حکومەتی هەرێمی کوردستان دەکەین کە ڤیزە و تکتی فرۆکەیان بۆ ئامادە کردین، بڕیارە کاتژمێر10ی بەیانی لە فرۆکەخانەی ئیستەنبووڵ بەرێ بکەوین بۆ فرۆکەخانەی شەرناخ لەوێشەوە بە پاس دەگەڕینەوە بۆ هەولێر.

 

لەلایەکی دیکەوە: فەرمانگەی پەیوەندییەکانی دەرەوەی حکومەتی هەرێمی کوردستان ڕایگەیاند، لە سۆنگەی پەرۆشیمانەوە بۆ هاونیشتمانیانمان لیژنەیەکی تایبەتمەندمان لەگەڵ وەزارەتی ناوخۆ پێکهێناوە، لەگەڵ هاووڵاتییانمان لە پەیوەندیداین تاوەکو بتوانین بە زووترین کات بیانگەڕێنینەوە. 

 

زانیاریی زیاتر: گرفتی ئەو 100 هاونیشتمانییە لەوەدابوو کە ڤیزای تورکیایان نەبوو و بەشێوەی ترانزێت دەگەڕانەوە و نەیان دەتوانی لە فڕۆکەخانەی ئیستەنبووڵ بچنە دەرەوە.