هۆشدارییەک لە سەرۆکی پەرلەمانی عێراقەوە لەبارەی جەنگی ئیسرائیل و ئێران

ئاڤا نیوز

سەرۆکی ئەنجوومەنی نوێنەرانی عێراق، داوای ئامادەبوونی سەرۆکایەتییەکان و هاوپەیمانیی ئیدارەی دەوڵەت لە دانیشتنی ڕۆژی سێشەممە دەکات بۆ تاوتوێکردنی دۆخی ناوچەکە و هاوکات هۆشداریی لە "پیلانگێڕییەکی گەورە" دەدات.

چیرۆکی سەرەکی: مەحموود مەشهەدانی، سەرۆکی ئەنجوومەنی نوێنەرانی عێراق و قاسم ئەعرەجی، ڕاوێژکاری ئاسایشی نیشتمانیی عێراق کۆبوونەوە، لە کۆبوونەوەکەدا گفتوگۆ لەبارەی هێرشی ئیسرائیل بۆ سەر ئێران و کاریگەرییەکانی لەسەر ئاسایشی نیشتمانیی عێراق و دەرەنجامە سیاسی و ئەمنی و ئابوورییەکان کرا.

ڕاگەیێنراوی فەرمی: بە گوێرەی ڕاگەیێنراوی نووسینگەی سەرۆکی ئەنجوومەنی نوێنەران، مەشهەدانی جەختی لەسەر بەستنی دانیشتنێکی نائاسایی پەرلەمان کردەوە لە ڕۆژی سێشەممە 17ـی حوزەیران، بە ئامانجی یەکخستنی هەڵوێستێکی گشتی دژی پێشێلکردنی سەروەریی عێراق.

لە هەمان کاتدا: مەشهەدانی داوای کرد هاوپەیمانی ئیدارەی دەوڵەت و سێ سەرۆکایەتییەکە ئامادەی دانیشتنەکەی پەرلەمان بن و داواشیکرد سەرکردەکانی هێڵی یەکەم ئامادەی بن.

مەترسییە پێشبینكراوەكان:  سەرۆکی ئەنجوومەنی نوێنەران ئاماژەی بە پێویستیی عەقڵ و دانایی کرد بۆ پاراستنی یەکڕیزیی کۆمەڵگە و ئەوەی کە "یەکڕیزیمان لە هێزماندایە و پیلانگێڕییەکە گەورەیە."