ئەردۆغان: دەبێت سوپای تورکیا بۆ هەموو بارودۆخێکی لەناکاو ئامادە بێت

ئاڤا نیوز

سەرۆککۆماری تورکیا داوا دەکات، ئیسرائیل هێرشەکانی ڕابگڕێت و کۆتایی بە ستەمەکانی بێنێت. دەشڵێت، دەبێت سوپای تورکیا بۆ هەموو بارودۆخێکی لەناکاو ئامادە بێت.

وێنە گەورەکە: ڕەجەب تەیب ئەردۆغان، سەرۆککۆماری تورکیا ئێوارەی ئەمڕۆ دووشەممە 16-6-2025، سەرپەرشتی کۆبوونەوەیەکی کابینەکەی کرد و تێیدا گفتوگۆ لەبارەی دۆخی ئێستای ڕۆژهەڵاتی ناوەڕاست و گرژییەکانی نێوان ئیسرائیل و ئێرانی کرد. لە دوای کۆبوونەوەکە لە کۆنگرەیەکی ڕۆژنامەوانی داوای خۆئامادەکردنی سوپای ووڵاتەکەی کرد بۆ هەر بارودۆخێکی لەناکاو.

لێدوانی فەرمی:  ئەردۆغان لە کۆنگرەیەکی ڕۆژنامەوانیدا ڕایگەیاند، ڕۆژهەڵاتی ناوەڕاست بەقۆناغێکی هەستیاردا تێدەپەڕێت و دەبێت سوپا و خەڵکی تورکیا بۆ هەموو بارودۆخێکی لەناکاو ئامادە بن.

لە درێژەی وتەکانیدا دەڵێت:

- لە ڕۆژی هەینییەوە من و وەزیری دەرەوە هەوڵەکانمان بۆ چارەسەرکردن و هێورکردنەوەی دۆخەکە دەستپێکردووە و لەگەڵ ترەمپ و سەرۆکەکانی میسر و سووریا و ڕووسیا و سەرۆکوەزیرانی عێراق و زۆرینەی سەرۆکەکانی دەوڵەتانی ڕۆژهەڵاتی ناوەڕاست پەیوەندیمان هەبووە.

- ڕۆژئاوا پشتگیری ئیسرائیل دەکات بۆ هێرشەکرنە سەر ئێران و دەبێت لە هەڵەی خۆیان بگەڕێنەوە.

- هێرشەکانی ئیسرائیل مەترسییەکی گەورەی بۆ ڕۆژهەڵاتی ناوەڕاست دروست کردووە.

- ئیسرائیل بەم ستەمانەی، داهاتووی دەوڵەتەکەی بەرە تیاچوون دەبات.

- هێرشکردنە سەر ئێران تەنیا کاریگەری لەسەر دەوڵەت و خەڵکی ئێران نابێت و ڕۆژهەڵاتی ناوەڕاست بەرەوە کارەساتی گەورە دەبات.

- تورکیا ئامادەی هەموو نێوەندگیری و دانوستاندنێکە، هەموو هێرش و بۆمبارانێک ڕەتدەکەینەوە.

- دەبێت پەند لە جەنگەکانی ڕابردوو وەربگرین.

- دەبێت بە ئەقڵیەتی دەوڵەتەوە لە دۆخی ناوچەکە بڕوانین و چارەسەری ئاشتییانە باشترین ڕێگە چارەیە.

ئەوەی پێویستە بیزانیت: تورکیا هەر لە یەکەم ڕۆژی دەستپێکی جەنگەکە هەوڵە دیپلۆماسییەکانی خستووەتە گەڕ بۆ کۆتایی هێنان بە شەڕەکە، تاکە چارەسەر گەڕانەوەیە بۆ سەر مێزی گفتوگۆی دیپلۆماسی و ڕێککەوتن.