20 وڵاتی عەرەبی و ئیسلامی دژی هێرشی ئیسرائیل هاتنە دەنگ

ئاڤا نیوز

 

وەزیرانی دەرەوەی 20 وڵاتی عەرەبی و ئیسلامی، سەرکۆنەی هێرشەکانی ئیسرائیل بۆ سەر ئێران دەکەن و "تەواوی نیگەرانی"ی خۆیان بەرامبەر بەو شەڕ و ئاڵۆزییانەی ناوچەکە دەردەبڕن.

 

چیرۆکی سەرەکی: لە ڕۆژی هەینییەوە، ئیسرائیل هێرشی ئاسمانیی بۆ سەر ژێرخانی چەکی ئەتۆمی و بە ئامانجگرتنی بەرپرسە باڵا سەربازییەکانی ئێران دەستیپێکردووە، لەو کاتەوە هەردوو وڵات بە چڕی یەکتری بۆردوومان دەکەن.

 

ڕاگەیێنراوی فەرمی: وەزیرانی دەرەوەی 20 وڵاتی عەرەبی و ئیسلامی لە ڕاگەیێنراوێکی هاوبەشدا ڕایانگەیاند: هێرشکردنە سەر کۆماری ئیسلامیی ئێران ڕەتدەکەینەوە و سەرکۆنەی دەکەین، پێویستە کردەوەکانی دوژمنکارانە دژی ئەو وڵاتە ڕابگیرێت و جەخت لەسەر کارکردن لەپێناو هێورکردنەوەی دۆخەکە دەکەین، تاوەکو گەیشتن بە ئاگربەست و پێویستە بە زووترین کات لایەنەکان بگەڕێنەوە سەر مێزی دانوستان.

 

- گرنگە ناوچەی ڕۆژهەڵاتی ناوەڕاست لە چەکی ئەتۆمی و چەکی کۆمەڵکوژیی وێرانکەر چۆڵبکرێت و بەپێی بڕیارە نێودەوڵەتییەکانی پەیوەست بەم بابەتەوە، پێویستیشە هەموو وڵاتانی ناوچەکە بێنە نێو پەیماننامەی قەدەغەکردنی بڵاوبوونەوەی چەکی ئەتۆمی.

 

زانیاریی زیاتر: ئەو وڵاتانە بریتی بوون لە؛ عێراق، شانشینی ئوردن، ئیمارات، پاکستان، شانشینی بەحرەین، بڕۆنای، تورکیا،  چاد، جەزائەر، کۆماری قەمەری یەکگرتوو، جیبۆتی، سعودییە، سوودان، سۆماڵ، عوممان، قەتەر، کوێت، لیبیا، میسر و مۆریتانیا.