پەیامێکی تووند لە ڕاوێژکاری ئەڵمانیاوە بۆ ئێران: لەناوبردنی بەرنامەی ئەتۆمی بژاردەیەکی بەردەستە

ئاڤا نیوز

ڕاوێژکاری ئەڵمانیا ڕایدەگەیێنێت، ئەگەر حکومەتی ئێران خواستی گەڕانەوەی بۆ سەر مێزی گفتوگۆکان نیشان بدات، ئەوا پێویست بە دەستوەردانی سەربازیی زیاتر نابێت، بەپێچەوانەوە ڕەنگە لەناوبردنی تەواوەتی بەرنامە ئەتۆمییە سەربازییەکەی ئێران ببێتە بژاردەیەکی بەردەست.

لێدوانی فەرمی: فرێدریش مێرتس، لە چاوپێکەوتنێکدا لە پەراوێزی لووتکەی گرووپی جی حەوت لە کەنەدا ڕایگەیاند، "سوپای ئیسرائیل بەڕوونی توانای جێبەجێکردنی تەواوەتی ئەم ئەرکەی نییە، چونکە ئەو چەکە پێویستانەی نییە، بەڵام ئەمریکییەکان هەیانە".

لە هەمان کاتدا: ڕاوێژکاری ئەڵمانیا ڕێزی خۆی بۆ ئۆپەراسیۆنە سەربازییەکەی ئیسرائیل دژی بەرنامە ئەتۆمییەکەی ئێران دەربڕی و بە خزمەتێکی زانی کە پێشکەش بە هاوپەیمانە ڕۆژئاواییەکانی دەکات و گوتیشی: "هێرشەکانی ئیسرائیل ئێرانی لاواز کردووە، پێتان وا نەبێت فەرمانڕەوایانی تاران بگەڕێنەوە بۆ هێزی پێشوویان".

مێرتس دەشڵێت: "ئەوپەڕی ڕێزم هەیە بۆ سوپا و حکومەتی ئیسرائیل کە ئەو ئازایەتییەیان هەبوو ئەم کارە ئەنجام بدەن [هێرشکردنە سەر ئێران]، چونکە ئەگەر ئەوە نەبووایە، ڕەنگە بۆ چەندین ساڵی داهاتوو ڕووبەڕووی ترس و تۆقاندنی ئەم ڕژێمە ببووینایەتەوە".