دوایین پێشهاتەکان.. هەڕەشەکانی ئیسرائیل و ئێران بۆ سەر یەکتر بەردەوامن

ئاڤا نیوز

جەنگی نێوان ئیسرائیل و ئێران لە پێنجەمین ڕۆژیدا بەردەوامە، سەرۆکی ئەمریکاش هەڕەشە لە ئێران دەکات و داوای لێدەکات بێ مەرج خۆی بەدەستەوە بدات، ئێرانیش داوای چۆڵکردنی هەردوو شاری تەلئەبیب و حەیفای ئیسرائیل دەکات.

چیرۆکی سەرەکی: ماوەی پێنج ڕۆژە ئیسرائیل و ئێران بە نوێترین تەکنەلۆژیای سەربازیی سەردەم ڕووبەڕووی یەکتربوونەتەوە، ئێستاش هەموو چاوەکان لەسەر دوابڕیاری سەرۆکی ئەمریکان بۆ ڕاگرتنی شەڕ و ناچارکردنی هەردوو وڵات بە ئاگربەست، یاخود چوونەپاڵ ئیسرائیل و ناچارکردنی ئێران بەزەبری هێز بۆ وازهێنان لە بەرنامە ئەتۆمییەکەی.

نوێترین هەواڵ لەسەر ئەم بابەتە:

 

- دوای ئاگادارینامەکەی ئیسرائیل بۆ دانیشتووانی ناوچەی 18 لە تاران، ئیسرائیل هێرشەکانی بۆ ئەو شوێنانە دەستپێکرد کە دەکەونە ئەو ناوچەیە و ئێستا دووکەڵ لە هەندێک خاڵی ناوچەکە بەرز دەبێتەوە.

 

- عەلی خامنەیی ڕێبەری باڵای کۆماری ئیسلامیی ئێران لە تۆڕی کۆمەڵایەتیی ئێکس ڕایگەیاند، "سازش بۆ ئیسرائیل ناکەین و دەبێت بەتووندی مامەڵەیان لەگەڵ بکەین".

 

- سوپای ئیسرائیل دانیشتووانی ناوچەی 18ـی شاری تاران ئاگادار دەکاتەوە کە ئەو شوێنە بە زووترین کات چۆڵ بکەن. ناوچەکە نزیکەی 420 هەزار خەڵکی تێدا دەژیت و چڕی دانیشتووانی زۆر بەرزە.

 

-کەمێک پێش ئێستا دۆناڵد ترەمپ، سەرۆکی ئەمریکا و بنیامین نەتەنیاهۆ سەرۆکوەزیرانی ئیسرائیل قسەیان کرد.

- کۆبوونەوەی ترەمپ و ئەنجوومەنی ئاسایشی نیشتمانیی ئەمریکا کۆتاییهات.

- وتەبێژی کۆشکی سپی: ڕەنگە ترەمپ دوای کۆبوونەوەکە لێدوانی ڕۆژنامەوانی بدات.

- کەناڵی سی بی ئێسی ئەمریکی ئاشکرای کردووە، بژاردەی هێرشکردنە سەر پێگە ئەتۆمییەکانی ئێران لە نێوان ڕاوێژکارانی ترەمپ کۆدەنگی لەسەر نییە.

- سوپای پاسداران ڕایگەیاند، لە هێرشە تازەکانیدا بنکە ئاسمانییەکانی ئیسرائیلی کردووەتە ئامانج.

- سوپای ئیسرائیل ئاشکرای کرد، هێرشێکی دیکەی مووشەکی ئێران بۆسەر وڵاتەکەیان دەستیپێکردووە، بۆیە داوای لە هاووڵاتیان کرد سەرلەنوێ بچنەوە پەناگە و شوێنە پارێزراوەکان.

ئەوەی پێویستە بیزانیت: بەپێی میدیا ئیسرائیلییەکان، لەسەرەتای هێرشەکانی ئێرانەوە 24 هاووڵاتیی ئیسرائیلی کوژراون و هەزار و 300ی دیکەش برینداربوون.

لەلایەکی دیکەوە: وەزارەتی تەندروستی ئیسرائیل دەڵێت، بەهۆی هێرشەکانی ئەمشەوی ئێرانەوە، 94 بریندار گەیێنراونەتە نەخۆشخانەکانی ئیسرائیل.