لە بەشێکی زۆری پارێزگاکانی ئێران ئینتەرنێت دەپچڕێت

ئاڤا نیوز

لە بەشێکی زۆری پارێزگاکانی ئێران هێڵەکانی ئینتەرنێت سنووردار کراون و بڕیارە ئەمشەو بەتەواوی بکرێتە ناوخۆیی، ئەوەش مانای وایە ناتوانرێت پەیوەندی بەدەرەوە بکرێت.

وێنە گەورەکە: بەپێی قسەی بەکارهێنەرانی ئێران کە قسەیان بۆ میدیاکان کردووە، لە دوێنێوە ئینتەرنێت لە تارانی پایتەخت  تووشی پچڕانی بەرفراوان بووەتەوە، کوالێتییەکەشی زۆر دابەزیوە و زۆر خاو بووەتەوە.

لێدوانی فەرمی: فاتمە موهاجرانی، وتەبێژی حکومەتی ئێران ڕایگەیاند، بڕیاری کەمکردنەوەی خێرایی ئینتەرنێت کاتییە، ئامانج لێی ڕووبەڕووبوونەوەی ئەو هێرشە ئەلیکترۆنییانەی ئیسرائیلە کە ژێرخانی دیجیتاڵیی ئێران دەکەنە ئامانج.

وتەبێژی حکومەتی ئێران دڵنیاییشیداوە لەوەی کەی هەڕەشە ئەمنییەکان تەواو بوون، ئەوانیش ئینتەرنێت ئاسایی دەکەنەوە.

لەلایەکی دیکەوە: میدیاکان باس لەوە دەکەن ئەمشەو خزمەتگوزاریی ئینتەرنێت لە هەموو شارەکانی ئێران دەگۆڕدرێت بۆ تۆڕی نیشتمانیی ناوخۆیی، ئەوەش مانای وایە تەنیا لە ناوخۆ ئیش دەکات و بەکارهێنەران ناتوانن وێنە و ڤیدیۆ بۆ دەرەوە بنێرن، هەروەها ناتوانن لەڕێگەی ئینتەرنێتەوە پەیوەندی بە خەڵکی دەرەوەی ئێران بکەن.