ئێران بە مووشەکی نوێ هێرشی بۆ سەر ئیسرائیل دەستپێکردەوە و ئەمریکاش ئامادەیە

ئاڤا نیوز

سوپای ئیسرائیل ڕایگەیاند 10 مووشەک لە ئێرانەوە ئاراستەمان کراوە و ئێرانیش دەڵێت، بە مووشەکی نوێ هێرشەکەمان دەستپێکرد، پێنتاگۆنیش جەخت دەکاتەوە هێزەکانی ئەمریکا لە ڕۆژهەڵاتی ناوەڕاست کەوتە حاڵەتی ئامادەباشی بەرزەوە.

وێنە گەورەکە: ماوەی شەش ڕۆژە جەنگی نێوان ئیسرائیل و ئێران بەردەوامە و هەردوولا بە مووشەک و درۆن هێرش دەکەنە سەر یەکتر، لە هێرشەکانی ئەمشەو ئێران بۆ یەکەمجار مووشەکێکی نوێی بەکارهێنا و ئەمریکاش لە ڕۆژهەڵاتی ناوەڕاست کەوتە حاڵەتی ئامادەباشی بەرزەوە.

زانیاریی بەدەستهاتوو: سوپای ئیسرائیل ڕایگەیاند، چوار مووشەک و دوو درۆنی ئێرانمان خستە خوارەوە. و سوپای ئێرانیش ڕایگەیاند، مووشەکە نوێیەکەی ئێران ئاراستەی ئیسرائیل کرا. 

مووشەکە نوێیەکەی ئێران ناوی سجیلە، دوو هەزار بۆ دوو هەزار و 500 کلیۆمەتر دەڕوات، خێراییەکەی 8 هەزار و 645 کیۆمەترە لە یەک کاتژمێردا و لە ناوەڕاستی تارانەوە بە نزیکەیی بە 7 بۆ 8 خولەک دەگاتە ئیسرائیل.

لە لایەکی دیکەوە: بەرپرسانی سەربازی پێنتاگۆن ڕایانگەیاند: هێزەکانی ئەمریکا لە ڕۆژهەڵاتی ناوەڕاست کەوتە حاڵەتی ئامادەباشی بەرزەوە و ئامادەی وەڵامدانەوەی هەموو هەڕەشەو مەترسیەکن بۆ هێزەکانی ئەمریکا لە ڕۆژهەڵاتی ناوەڕاست.

ئێستا کەشتی سێیەمی فڕۆکە هەڵگری ئەمریکا بەڕێوەیە بۆ ڕۆژهەڵاتی ناوەڕاست و لە نزیک ئیسرائیل جێگیر دەکرێت و ئامادەی فەرمانەکانی دۆناڵد ترەمپ دەکەن لە ئەگەری دروستبوونی هەر گۆڕانکارییەکی سەربازی لە ناوچەکە.

زانیاریی زیاتر: بە گوێرەی سەرچاوە سەربازییە ئیسرائیلییەکان، لە ڕۆژی هەینییەوە تا ئیستا ئێران نزیکەی 400 مووشەکی بالیستی و هەزار درۆنی ئاراستەی ئیسرائیل کردوون. لەم ژمارەیە نزیکەی 20 مووشەکیان ئامانجەکانیان پێکاون و بە هۆیانەوە لانیکەم 24 ئیسرائیلی کوژراون.