حیزبوڵڵای عێراق هۆشداری دەداتە ئەمریکا: جووڵە بکات هێرش دەکەینە سەر بەرژەوەندییەکانی

ئاڤا نیوز

کەتائیبی حیزبوڵڵای عێراق، یەکێک لە باڵەکانی بزووتنەوەی "مقاوەمەی ئیسلامی لە عێراق"، هەڕەشە لە ئەمریکا دەکات لە چوونە ناو ئەو شەڕەی کە لەنێوان ئێران و ئیسرائیلدا هەڵگیرساوە.

وێنە گەورەکە: هێرشی مووشەکی نێوان ئیسرائیل و ئێران پێی نایە حەوتەمین ڕۆژ و تادێت پەرەسەندنی زیاتر بەخۆیەوە دەبینێت. هاوکات لایەنە عێراقییەکان ترسی ئەوەیان هەیە ئاگری جەنگ عێراقیش بگرێتەوە.

ڕاگەیێنراوی فەرمی: ئەبو عەلی عەسکەری، بەرپرسی ئەمنیی کەتائیبی حیزبوڵڵای عێراق، لە ڕاگەیێنراوێکدا جەختی کردەوە کۆماری ئیسلامی خاوەنی پێداویستیی خۆڕاگرییە و دەتوانێت بە هەمان ڕیتم بۆ ماوەی زیاتر لە ساڵێک مووشەک ئاراستەی ئیسرائیل بکات.

٠ هاتنەناوەوەی ئەمریکا بۆ ناو جەنگەکە "وێرانکاریی پێشینە نەبوو"ـی بەدوادا دێت و هەموو بەرژەوەندییەکانی لە ڕۆژئاوای ئاسیا دەکەنە ئامانج.

٠ ناوبراو هەڕەشەکانی دۆناڵد ترەمپ بە "قسەی پڕوپووچ" وەسف دەکات و ئاماژە بۆ ئەوە دەکات هەڕەشەکردن لە دۆخی ئێستای عێراق، ساردیان ناکاتەوە لە "دۆزە سەرەکییەکەیان" بۆ ڕووبەڕووبوونەوەی ئەو جۆرە هەڕەشانە.