وادەی دواخستنی گەشتی عومرە لە هەرێمی کوردستان درێژ دەکرێتەوە

ئاڤا نیوز

بەڕێوەبەرایەتی گشتیی حەج و عومرە ئەو کۆمپانیایانە ئاگادار دەکاتەوە کە تاوەکو خۆیان ڕێنمایی دەرنەکەن، ناتوانن هیچ گەشتێک بەمەبەستی عومرە ڕێکبخەن، بۆ ماوەیەکی نادیار گەشتەکان ڕادەگیرێن.

وێنە گەورەکە: نزیکەی 40 ڕۆژە وەرزی گەشتکردنی کۆمپانیاکان بەهۆی حەجکردنەوە ڕاگیراوە، ناسەقامگیری دۆخی ناوچەکە و ڕاگرتنی گەشتی فڕۆکەخانەکانی هەرێمی کوردستان ماوەکە درێژ دەکاتەوە، تەنانەت کۆمپانیاکان ناتوانن لەڕێگەی وشکانیشەوە خەڵک ببەن بۆ عومرە.

لێدوانی فەرمی: کاروان ستوونی، وتەبێژی بەڕێوەبەرایەتی گشتیی حەج و عومرەی کوردستان بە ئاڤای گوت، "هیچ کۆمپانیایەک بۆی نییە تاک لایەنانە وادەی دەستپێکردنی گەشتەکانی عومرە ڕابگەیێنێت، هەر کەس و کۆمپانیایەکیش سەرپێیچی بکات ئەوا ڕووبەڕووی لێپێچینەوەی یاسایی و کارگێری دەبێتەوە."

ئەمەش بزانە: بەڕێوەبەرایەتی گشتی حەج و عومرەی کوردستان بە مەبەستی دەستپێکردنی پرۆسەی عومرەی  ئەمساڵ  پلانی داناوە، دەبێت کۆمپانیاکان کار بەو ڕێنماییە نوێیانە بکەن کە لەلایەن بەڕێوەبەرایەتی حەج و عومرەوە دەردەکرێن.