ئیسرائیل هێرشێکی دیکەی بۆ سەر ئێران ڕاگەیاند

ئاڤا نیوز

سوپای ئیسرائیل ڕایگەیاند، هێزە ئاسمانییەکانیان چەند هێرشێکی نوێیان کردووەتە سەر توانا سەربازییەکانی ئێران لە ڕۆژئاوای ئەو وڵاتە.

چیرۆکی سەرەکی: بەرەبەیانی ڕۆژی هەینی 13-6-2025، جەنگی نێوان ئیسرائیل و ئێران هەڵگیرسا کە تاوەکو ئێستا دەیان پێگەی ستراتیژی سەربازی و بنکە ئەتۆمییەکانی یەکتریان بۆردوومان کردووە و هیچ ئاماژەیەکیش بۆ دامرکاندنەوەی ئاگری ئەم جەنگە نییە.

ڕاگەیێنراوی فەرمی: لە ڕاگەیێنراوێکدا کە بڵاویکردووەتەوە، هێزە ئاسمانییەکانیان بە 20 فڕۆکەی جەنگی چەند هێرشێکی نوێی ئاسمانییان کردووەتە سەر ڕۆژئاوای ئێران و توانا سەربازییەکان و ژێرخانی مووشەکی بالیستی ئەو وڵاتەیان کردووەتە ئامانج.

لە لایەکی دیکەوە: بانگەشەی ئەوە کراوە، فڕۆکەیەکی بێفڕۆکەوانی ئیسرائیل لە ئێران ئەو بارهەڵگرانەی کردووەتە ئامانج کە مووشەکی بالیستییان هەڵگرتووە.