ئیسرائیل بەردەوامە لە کوشتنی زانا ئەتۆمییەکانی ئێران

ئاڤا نیوز

کوشتنی زانا ئەتۆمییەکانی ئێران لەلایەن ئیسرائیلەوە بەردەوامە و میدیاكانی ئیسرائیل دەڵێن تا ئێستا 17 زانای ئەتۆمی ئێران کوژراون. میدیاكانی ئێرانیش کوژرانی 14ـیان پشتڕاست کردووەتەوە. شەوی ڕابردووش زانایەکی دیکەی ئەتۆمی لە ماڵەکەی خۆی کوژرا.

وێنە گەورەکە: جەنگی نێوان ئیسرائیل و ئێران ماوەی نۆ ڕۆژە بەردەوامە، ئامانجی سەرەکی ئیسرائیل لەو جەنگە لەناوبردنی بنکە ئەتۆمییەکان و کوشتنی زانا ئەتۆمییەکانە، تا ئێستاش چەندین زانای ئەتۆمی کوشتووە.

زانیاریی زیاتر: زۆربەی زانا ئەتۆمییەکان لە یەکەم ڕۆژی هێرشی ئیسرائیل لە 13ـی ئەم مانگەدا کوژران، بەڵام ئیسرائیل ئێستاش بەدوایاندا دەگەڕێت و لە هەر شوێنێک بیاندۆزێتەوە بە هەر جۆرێک بێت هەوڵی کوشتنیان دەدات.

ئیسرائیل لەڕێگەی کوشتنی زانا ئەتۆمییەكان دەیەوێت زیان لە پرۆگرامە ئەتۆمییەكەی ئێران بدات و پەکی بخات.

زانیاریی بەدەستهاتوو: میدیاکانی ئێرانی بڵاویانکردەوە، شەوی ڕابردوو لە ناوچەی مەرزدارانی شاری تاران، دکتۆر ئەمیر حوسێن فەقیهی، جێگری بەڕێوەبەری ڕێکخراوی وزەی ئەتۆمی ئێران و یەکێک لە زانا بەناوبانگەکانی ئەو وڵاتە، لە ماڵەکەی خۆیدا کوژراوە.

سیخوڕەکانی مۆساد درۆنێکی بچکوکی بۆمبڕێژکراویان بە ماڵەکەیەوە ناوە، ڕاستەوخۆ خۆیی و ژنەکەی و پاسەوانێکی کە لە ماڵەکەی بووە کوژراون.