سەرکردەکانی بەرەی مقاوەمە کۆدەبنەوە و بڕیاری یەکلاکەرەوە دەدەن

ئاڤا نیوز

دوا بەدوای هێرشەکەی ئەمریکا بۆ سەر بنکە ئەتۆمییەکانی ئێران،  چاوەروان دەکرێت لەچەند کاتژمێری داهاتوودا سەرجەم لایەنەکانی نێو "بەرەی مقاوەمەی ئیسلامی لە عێراق" کۆببنەوە.

وێنە گەورەکە: بەرە بەیانیی ڕۆژی یەکشەممە، ئەمریکا هێرشێکی ئاسمانی فراوانی کردە سەر دامەزراوەی ئەتۆمیی فۆردو، ئەسفەهان و نەتەنز لەئێران، وەک یەکەم کاردانەوەی فەرمی ئێرانیش وەزیری دەرەوەی ئەو وڵاتە ئاشکرایکرد، کە هیچ ڕێگەیەک بۆ دانوستان و گفتوگۆکردن نەماوە.

لێدوانی فەرمی: سەرچاوەیەکی بەرپرس لە "لیژنەی هەماهەنگی بەرەی مقاوەمەی ئیسلامی لەعێراق" بە ئاڤا میدیای ڕاگەیاند: بڕیارە لە چەند کاتژمێری داهاتوودا سەرکردەکانی گرووپە چەکدارەکانی بەرەی مقاوەمە کۆببنەوە و هەڵوێستی خۆیان بۆ پاڵپشتی ئێران دژی ئیسرائیل بەفەرمی ڕابگەیەنن.

زانیاریی زیاتر: ئەو سەرچاوەیە ئاماژەی بەوەشکرد، سەرکردەکانی بەرەی مقاوەمە لەژێر فشاری تووندی حکومەتی عێراق و لایەنە سیاسییەکانی نێو چوارچێوەی هەماهەنگیدان بۆ ئەوەی بەشداری لە جەنگەکەدا نەکەن، بەڵام ئەم بابەتە لە چەند کاتژمێری داهاتوودا لە کۆبوونەوەکەدا یەکلایی دەکرێتەوە.

لەلایەکی دیکەوە: سەیف ڕەعد، شارەزای کاروباری سەربازی عێراقی هۆشداری لە مەترسیی هێرشکردنە سەر ئامانج و بەرژەوەندییەکانی ئەمریکا لە عێراق دەدات، کە ڕەنگە لانی کەم سزای ئابووری ئەمریکای بۆ سەر عێراق لێبکەوێتەوە.