ئیسرائیل شەش فڕۆکەخانەی سەربازی لە ئێران بۆردوومان دەکات و ئێرانیش هێرشی مووشەکی دەکاتە سەر ئەو وڵاتە

ئاڤا نیوز

هێرشەکانی سوپای ئیسرائیل بۆ سەر ئێران بەردەوامن و لە دوایین ئۆپەراسیۆندا، شەش فڕۆکەخانەی سەربازی لە ڕۆژئاوا، ناوەڕاست و ڕۆژهەڵاتی ئێران بۆردوومانکرد، لە بەرامبەردا ئێران چەندین مووشەکی ئاڕاستەی ئەو وڵاتە کرد.

وێنە گەورەکە: جەنگی نێوان ئیسرائیل و ئێران بەردەوامە، دوای هێرشەکەی ئەمریکا بۆ سەر بنکە ئەتۆمییەکانی ئێران و بەشداریکردنی لە جەنگەکە پێشبینی دەکرێت جەنگ لە ناوچەکە بەرفراوانتر بێت.

ڕاگەیێنراوی فەرمی: ئەمڕۆ دووشەممە، سوپای ئیسرائیل ڕایگەیاند: هێرشمان کردە سەر ژێرخانی سەربازیی ئێران لە کرمانشان، شەش فڕۆکەخانەی ئێرانمان بۆردوومان کرد، هاوکات بە فڕۆکەی بێفڕۆکەوان 15 فڕۆکە و هێلیکۆپتەری جەنگیی ئەو وڵاتەمان لە ناوبرد.

زانیاریی زیاتر:  سوپای پاسداران بڵاوی کردووەتەوە، بەهۆی هێرشی ئیسرائیلەوە بۆ سەر دوو بنکەیان لە پارێزگای یەزد 10 کەس گیانیان لەدەستداوە.

لەلایەکی دیکەوە: ئێران چەند مووشەکێکی ئاڕاستەی ئیسرائیل کرد و سوپای ئەو وڵاتەش سیستمەکانی بەرگریی ئاسمانیی چالاک کردووە و مووشەکەکانی خستووەتە خوارەوە.

ئەوەی ئێستا ڕوودەدات: نوێترین زانیارییەکانی جەنگی نێوان ئیسرائیل و ئێران ئەمانەن:

٠ بەرەی ناوخۆی ئیسرائیل: شەپۆڵێکی دیکەی مووشەکی ئێران ئاڕاستەی باکووری ئیسرائیل کرا.

٠ ئێران ژمارەیەک مووشەکی ئاراستەی ئیسرائیل کرد و زەنگی ئاگادار کردنەوە لە تەواوی ئیسرائیل لێدرا.

٠ كەناڵی 12ـی ئیسرائیل: پێنج مووشەكی ئێران لە چەند ناوچەیەك كەوتوونەتە خوارەوە. کە یەکێکیان لە باشووری قودس كەوتووەتە خوارەوە.

٠ جێگری وەزیری دەرەوەی ئێران: بەردەوام دەبین لە پیتاندنی یۆڕانیۆم.

٠ دەستەی پەخشی ئیسرائیل: ئێران چوار درۆنی ئیسرائیلی خستوونەتە خوارەوە.

٠ بارەگای خاتەم ئەنبیای ناوەندی: هێرشەکەی ئەمریکا ئامانجەکانمان فراوانتر دەکات و  جەنگ لە ناوچەکە بڵاودەکاتەوە.