سوودانی و پووتین بە تەلەفۆن لەبارەی جەنگی ئیسرائیل و ئێران قسە دەکەن

ئاڤا نیوز

سەرۆکوەزیرانی عێراق و سەرۆکی ڕووسیا، دوا پێشهاتەکانی ناوچەکە و جیهانیان تاوتوێ کرد و سوودانی هەڵوێستی ڕوونی عێراقی دووپات کردەوە لە ڕەتکردنەوەی هێرشەکانی ئیسرائیل بۆ سەر ئێران و "بۆردومانی ئەمریکا" بۆ سەر دامەزراوە ناوەکییەکان.

چیرۆکی سەرەکی: ڕۆژی دووشەممە 2025-6-23، محەممەد شیاع سوودانی، سەرۆکوەزیرانی عێراق گفتوگۆیەکی تەلەفۆنی لەگەڵ ڤلادیمیر پووتین، سەرۆکی ڕووسیا  ئەنجامدا و باسی دوا پێشهاتەکانی دۆخی هەرێمی و نێودەوڵەتیی کرا.

ڕاگەیێنراوی فەرمی: بەگوێرەی ڕاگەیەندراوی نووسینگەی سەرۆکوەزیرانی عێراق، سوودانی جەختی لە ڕەتکردنەوەی ڕوون و ئاشکرای عێراق کردەوە لە هێرشی ئیسرائیل بۆ سەر ئێران و ئەو پەرەسەندنە مەترسیدارەی کە بریتییە لە بۆردومانی ئەمریکا بۆ سەر دامەزراوە ناوەکییەکان، هەروەها ئیدانەکردنی عێراق بۆ بەزاندنی ئاسمانەکەی لەلایەن فڕۆکە ئەمریکی و ئیسرائیلییەکانەوە، جەختکردنەوە لەسەر پشتیوانیکردن لە هەنگاوەکانی عێراق بۆ ڕێگریکردن لە پێشێلکردنی سەروەرییەکەی و گرتنەئەستۆی ڕۆڵی سەرەکیی خۆی لەلایەن ئەنجوومەنی ئاسایشی نێودەوڵەتییەوە بۆ ڕاگرتنی جەنگ.

لە هەمان کاتد: سەرۆکوەزیرانی عێراق جەختیشی لەسەر گرنگیی خستنەگەڕی هەوڵی دیپلۆماسیی زیاتر کردەوە، سەرەڕای نەبوونی باوەڕپێکراوی و لاوازیی متمانە بەهۆی ئەو دەستدرێژییەی کە کاریگەریی کردە سەر بەڕێوەچوونی دانوستانەکان.

لە بەرامبەردا: بەگوێرەی ڕاگەیێنراوەکە، ڤلادیمیر پووتین جەختی لە گرنگیی کۆتاییهێنان بە پەرەسەندنەکان کردەوە و بە سوودانی ڕاگەیاند، کە هەوڵی تایبەتی لەم چوارچێوەیەدا دەدات، هاوکات ستایشی هەوڵەکانی حکومەتی عێراقی کرد بۆ ڕێگریکردن لە فراوانبوونی جەنگ، پێشێلکردنی ئاسمان و سەروەریی عێراقیشی ڕەتکردەوە.