لەترسی بە ئامانجگرتنیان؛ فەرماندەی گرووپە چەکدارەکانی عێراق دیار نەماون

ئاڤا نیوز

بەهۆی مەترسی کردنەئامانجیان لەلایەن ئیسرائیلەوە، فەرماندەی گرووپە چەکدارەکانی عێراق ڕێکاری ئەمنیی توندیان گرتووەتەبەر، لەوانەش شوێنی مانەوەیان گۆڕیوە و هەموو چالاکییەکانیشیان هەڵوەشاندووەتەوە.

وێنە گەورەکە: بەهۆی ئەوەی لە چەند ڕۆژی ڕابردوودا باسیان لە گریمانەی پشتیوانیی ئێران کردووە ئەگەر ئەمریکا هێرشبکاتەسەر ئەو وڵاتە، فەرماندەی گرووپە چەکدارەکانی عێراق مەترسی ئەوەیان هەیە ئیسرائیل لە تۆڵەی ئەو قسانەیان بیانکاتە ئامانج.

زانیاریی بەدەستهاتوو: ئەندامێکی پەرلەمانی عێراق کە نزیکە لەو گرووپە چەکدارانە بە ماڵپەڕی عەرەبی جەدیدی ڕاگەیاندووە، بەرپرسی گرووپە چەکدارەکان خۆیان شاردوەتەوە و ئێستا کەس نازانی لەکوێن، بەهۆی مەترسی بە ئامانجگرتنیشیان مۆبایل و ئامێرەکانیان لەخۆیان دوورخستووەتەوە.

ئاماژەی بەوەشکردووە، ئەو فەرماندانە بەشداریی هیچ کۆڕ و کۆبوونەوەیەک ناکەن، بە پاسەوانەکانیشیان وتووە بچنە ماڵەوە و تەنیا کەسە نزیکەکانی خۆیان بۆ پاراستنیان، لەدەوروپشتیان ماون.