سوپای ئیسرائیل ئاماری نوێ سەبارەت بە جەنگی 12 ڕۆژەی لەگەڵ ئێران بڵاودەکاتەوە

ئاڤا نیوز

 

لە ماوەی 12 ڕۆژی جەنگی نێوان ئێران و ئیسرائیل، ئیسرائیل دەڵێت: 28 کەسی کوژراون و 3 هەزار و 238 کەسیش بریندار بوون کە لەو ژمارەیە برینی 23 کەسیان سەختە، 111 برینیان مامناوەندە، 2933 برینیان سووکە، 138 کەسیش دوچاری دۆخی دەروونی بوون.

 

وێنە گەورەکە: جەنگی نێوان ئیسرائیل و ئێران بۆ ماوەی 12 ڕۆژ بەردەوام بوو، ئەمەش لە کاتێکدا بوو کە هێزی ئاسمانی ئیسرائیل لە بەرەبەیانییەکی زوودا هێرشی فراوانیکردە سەر ئێران و بەهۆیەوە زیاتر لە 31 فەرماندەی سەربازی و 16 زانای بواری ئەو وڵاتەی کوشت، دوا بەدوا ئەوە شەڕ و ئاڵۆزییەکان فراوانبوون و جەنگی ڕاستەوخۆ و هێرشی ئاسمانی زیاتری لێکەوتەوە. 

 

زانیاریی زیاتر: هەر بەهۆی هێرشە مووشەکییەکانی ئێرانەوە، 9 هەزار کەس لە ماڵەکانی خۆیان بۆ شوێنی دیکەی سەلامەت لە ناو ئیسرائیل گوێزراونەتەوە، هاوکات 21 هەزار هۆشداری بۆ دانیشتوانی ئیسرائیل دەرکراوە.

 

ئەمەش بزانە: ئێران نزیکەی 550 مووشەکی بالیستی و هەزار درۆنی ئاراستەی ئیسرائیل کردووە و نیزیکە 90%ی مووشەکەکان و نزیکەی هەموو درۆنەکان خراونەتە خوارەوە. 

 

ژمارەکان وادەڵێن: بە گوێرەی مەزەندەکان ئێران 2 هەزار و 500 مووشەکی بالیستی و چەند هەزار درۆنی هەبوون. دوو لەسەر سێی سەکۆکانی هەڵدانی مووشەک، نزیکەی 250 سەکۆ و هەروەها نزیکەی هەزار مووشەکی تێکشکێنران. 

٠ هێزی ئاسمانیی ئیسرائیل نزیکەی هەزار فڕینی ئەنجام داوە.

زیاتر لە 600 ئۆپەراسیۆنی دابینکردنی سووتەمەنی لە ئاسمان ئەنجام داوە.

لە ڕێگە فڕۆکە و درۆنەوە، هەزاران بۆمب بەسەر سەدان ئامانجدا بەردراونەتەوە.

ئیسرائیل لانیکەم 15 زانای گەورەی بواری ئەتۆمیی و 30 فەرماندەی باڵای سەربازیی ئێرانی کوشتووە. 

ئیسرائیل نزیکەی 610 هاووڵاتیی مەدەنیی ئێرانی کوشتووە.