خۆپیشاندانی ناڕەزایەتی لە شارەکانی عێراق دەستپێدەکات

ئاڤا نیوز

 

"یارمەتیمان بدەن، بەسرە تینووە و ئاوەکەی پیس بووە"، بەهۆی نەبوونی ئاوی خواردنەوەی پاکژ و پیسبوونی سەرچاوەکانی ئاو، شەوی ڕابردوو دەیان کەس لە دانیشتوانی گەڕەکی حوسێن لە شاڕی بەسرە ڕژانە سەر شەرقامەکان و خۆپیشاندانی ناڕەزایەتییان دەستپێکردووە. 

 

وێنە گەورەکە: بەهۆی نەبوونی خزمەتگوزاریی شایستە و کەمبوونەوەی ئاوی خواردنەوە لە بەشێک لە شارەکانی عێراق، هاووڵاتییان ناڕەزایەتیی دەردەبڕن بۆ ئەوە لەلایەن بەرپرسانەوە ئاوڕێکی جددیان لێبدرێتەوە. 

 

زانیاریی بەدەستهاتوو: سەرچاوەیەکی ئەمنی لەپارێزگای بەسڕە ڕایگەیاند:  شەوی ڕابردوو دەیان دانیشتوی گەڕەکی حوسێن  و بەشێک لە چالاکوانان خۆپیشاندانێکی ناڕەزایەتییان ڕێکخست و داوای چارەسەرکردنی کێشەی نەبوونی ئاوی خواردنەوە و چارەسەرکردنی پیسبوونی سەرچاوە ئاوییەکانیان دەکرد، کە ئێستا زۆربەی ناوچەکانی بەسرە بەدەستییەوە دەناڵێنێت.

 

ئەوەی لەبارەیەوە دەگوترێت: بە گوێرەی ئەو گرتە ڤیدیۆیانەی کە لە میدیا عێراقییەکان بڵاوبووەتەوە، خۆپیشاندەران بە دروشمی 'یارمەتیمان بدەن، بەسرە تینووە و ئاوەکەی پیس بووە، ڕەخنەی تووندیان لە بێدەنگی حکومەتی خۆجێی و حکومەتی فیدراڵی سەبارەت بەم کێشەیە گرتووە.