لە غەززە 66 منداڵ لە برسا مردوون

ئاڤا نیوز

 

بەگوێرەی سەرچاوە پزیشکییەکانی کەرتی غەززە، ژمارەی ئەو منداڵانەی تا ئیستا لە کەرتی غەززە بەهۆی برسیێتی و خراپی خۆراکەوە گیانیان لەدەست داوە گەیشتووەتە 66 منداڵ.

 

چیرۆکی سەرەکی: ئەمە لە کاتێکدایە کە گەمارۆی تووند و داخستنی تەواوەتیی سنوورەکانی غەززە لەلایەن ئیسرائیلەوە بەردەوامە و هاوکات هێرشەکانیش بەردەوامن کە ڕۆژانە دەیان کەس بەهۆی هێرش یان تەقەی سەربازانی ئیسرائیل لەو کاتەی کە دەچن بۆ وەرگرتنی خۆراک، دەکوژرێن.

 

لێدوانی فەرمی: ڕێکخراوی تەندروستیی جیهانی (WHO) ڕایگەیاند، لە سەرەتای ئەمساڵەوە ڕۆژانە بەتێکڕا 112 منداڵ لەبەر بەدخۆراکی ڕەوانەی نەخۆشخانەکان دەکرێن.

 

ئەوەی ئێستا ڕوودەدات: ئێستا لە کۆی 36 نەخۆشخانەی کەرتەکە تەنیا 17 نەخۆشخانەیان بەشێوەیەکی ڕێژەیی و ناتەواویی کاردەکەن. هاوکات لە باکووری کەرتی غەززە و لە ناوچەکانی باشووریش هیچ نەخۆشخانەیەک کار ناکات و هەموویان بە بۆردوومانی ئیسرائیل وێران بوون.