ئێران: مەرجی ئەمریکا بۆ دەستبەرداربوون لە بەرنامەی ئەتۆمی ڕەتکراوەتەوە

ئاڤا نیوز

نوێنەری ئێران لە نەتەوەیەکگرتووەکان دەستبەرداربوونی وڵاتەکەی لە بەرنامەی ئەتۆمی ڕەتدەکاتەوە و ڕێکاری جێگرەوە دەخاتەڕوو.

 

وێنە گەورەکە: دوای ڕاگەیاندنی لەناوبردنی پێگە ئەتۆمییەکانی ئێران، دۆناڵد ترەمپ، سەرۆکی ئەمریکا پێشنیازی دەستپێکردنەوەی دانوستاندنەکانی خستەڕوو، مەرجی ئەمریکا بۆ ڕێککەوتنی ئاشتی بریتیە لە دەستبەرداربوونی تاران لە بەرنامە ئەتۆمییەکەی، بەڵام بەرپرسانی ئێران بە هەموو شێوەیەک ئەو داواکارییە ڕەتدەکەنەوە.

 

بڵاوکراوەی فەرمی: بەپێی ڕاپۆرتێکی ئاژانسی هەواڵی ئەلمۆنیتۆر، ئەمیر سەعید ئیروانی، نوێنەری ئێران لە نەتەوەیەکگرتووەکان ڕایگەیاندووە، تاران یۆرانیۆمی پیتێندراو دەگوازێتەوە بۆ وڵاتێکی دیکە لە ئەگەری ئەنجامدانی ڕێککەوتن لەگەڵ ئەمریکا، ڕێگەیەکی دیکەش ئەوەیە: ئەو بڕە یۆرانیۆمە پیتێندراوە لە ئێران بمێنێتەوە بەڵام لە ژێر چاودێری و سەرپەرشتی ئاژانسی نێودەوڵەتیی وزەی ئەتۆم بێت.

 

نوێنەرەکەی ئێران ئەوەشی ڕاگەیاندووە، وڵاتەکەی بە هیچ شێوەیەک دەستبەرداری بەرنامەی ئەتۆمی نابێت و پیتاندنی یۆرانیۆم بە ڕێژەی 20% یان بە ڕێژەی 60% بۆ ئێران هێڵی سوور نییە و داوای ئەمریکا بۆ دەستبەرداربوون لە پیتاندنی یۆرانیۆم ڕەتکراوەتەوە، لە کۆبوونەوەی نێوان هەردوو وڵات هەڵگرتنی سزاکان لەسەر بەرنامەی دروستکردنی مووشەکی بالیستیک یەکێک لە مەرجەکانی تاران دەبێت.