ترەمپ ئەحمەد شەرع بە پیاوێکی بەهێز ناودەبات و هۆشداریش بە نەتانیاهۆ دەدات

ئاڤا نیوز

سەرۆکی ئەمریکا لە ویلایەتی لە فلۆریدا سەبارەت بە هەڵگرتنی سزاکانی سەر سووریا قسەی کرد و ئەم قۆناغەی بە دەرفەتێکی گرنگ بۆ خەڵك و سەرۆکی سووریا ناو برد و هۆشداریشی بە نەتانیاهۆ دا سەبارەت بە دۆخی سووریا و غەزە.

وێنە گەورەکە: دوای بڕیاری ترەمپ سەبارەت بە هەڵگرتنی سزاکانی سەر سووریا و سڕینەوەی ناوی  518 سەرمایەدار و دامەزراوە لە لیستی سزاکاندا، ترەمپ لە مێزگردێکی کراوەدا لە فلۆریدا بەشداری کرد و لەسەر کۆمەڵێک پرسی نێودەوڵەتی و ناوخۆیی قسەی کرد و ئەم قۆناغەی بۆ سووریا بە قۆناغی گۆڕانکاری و پێشکەوتن ناوبرد.

لێدوانی فەرمی: دۆناڵد ترەمپ، سەرۆکی ئەمریکا لە وتەکانیدا ئاماژەی بە سووریا کرد و گوتی: لە دوایین هەنگاو سەبارەت بە ڕۆژهەڵاتی ناوەڕاست واژۆم لەسەر بڕیاری هەڵگرتنی سزاکانی سەر سووریا کرد، خەڵکی ئەو وڵاتە گەلێکی مەزنن و ئێستا سووریا لەلایەن پیاوێکی بەهێزەوە سەرۆکایەتی دەکرێت، ئەم بڕیارەی من دەرفەت و قۆناغیکی گەورەیە بۆ سووریا و دەبێت ئەم بڕیارە بکەن بە خاڵی وەرچەرخان و سووریایەکی نوێ بوونیاد بنرێت.

زانیاریی زیاتر: ترەمپ سەبارەت بە جەنگی غەزە و سەردانی بنیامین نەتانیاهۆ، سەرۆکوەزیرانی ئیسرائیل بۆ واشنتن گوتی، "زۆر یەکلاکەرەوە و تووند دەبم لەگەڵ سەرۆکوەزیرانی ئیسرائیل و پێی دەڵێم دەبێت جەنگ لە غەزە کۆتایی پێبێنێت و پەیوەندییەکان لەگەڵ سووریا بە تەواوی ئاسایی بکرێتەوە".