ئیسرائیل دەستگیرکردنی "شانەیەکی ئێرانی" لە باشووری سووریا ڕادەگەیێنێت

ئاڤا نیوز

وتەبێژی سوپای ئیسرائیل دەستگیرکردنی "شانەیەکی ئێرانی" لە باشووری سووریا لە ئۆپەراسیۆنێکی تایبەت ڕادەگەیێنێت و ئاماژە بۆ ئەوە دەکات، ئەو شانەیە لەلایەن ئێرانەوە جووڵەی پێکرابوو.

 

بڵاوکراوەی فەرمی: ئەفیخای ئەدرەعی، وتەبێژی سوپای ئیسرائیل لە ڕێگەی هەژماری فەرمیی خۆیەوە لەسەر تۆڕی کۆمەڵایەتیی فەیسبووک نووسیویەتی: "شەوی ڕابردوو، هێزەکانی لیوای 474ی سەر بە فیرقەی 210، ئۆپەراسیۆنێکی تایبەتیان ئەنجامدا بۆ دەستگیرکردنی شانەیەکی تێکدەر کە لەلایەن ئێرانەوە جوڵەی پێکرابوو لە ناوچەی ئوم ئەللوقس و عەین ئەلبەسەلی لە باشووری سووریا، ئەمەش بە هاوکاریی لێکۆڵەرە مەیدانییەکانی سەر بە یەکەی 504 بوو".

 

ئەدرەعی ئاماژەی بەوەشکرد، لەسەر بنەمای ئەو زانیارییە هەواڵگرییانەی کە لە هەفتەکانی ڕابردوودا و لە ئەنجامی لێکۆڵینەوەکاندا دەستیان کەوتوون، هێزەکانی لیواکە ئۆپەراسیۆنێکی چڕوپڕی شەوانەیان ئەنجامدا کە بووە هۆی دەستگیرکردنی ژمارەیەک تێکدەر. لە کاتی ئۆپەراسیۆنەکەدا، هێزەکان دەستیان بەسەر چەندین کەرەستەی جەنگیدا گرت، لەوانە چەک و نارنجۆکی دەستی لەو ناوچەیەی کە تێکدەرەکانی تێدا دەستگیر کران".

 

ئەوەی پێویستە بیزانیت: لە حوزەیرانی ساڵی 1967 ئیسرائیل دەستی بەسەر نزیکەی 1250 کیلۆمەتر چوارگۆشە لە بەرزاییەکانی جۆلان لە سووریادا گرت و پاشان لە ساڵی 1981دا بە کردەیی لکاندی بەخۆیەوە. لە دوای ڕووخانی ڕژێمەکەی ئەسەد لە کۆتاییەکانی 2024، هەژموونی خۆی لە ناوچەکانی جۆلان لە سووریا بەهێزتر کردووە.