سووریا: زووە باس لە ئاساییکردنەوەی پەیوەندی لەگەڵ ئیسرائیل بکەین

ئاڤا نیوز

میدیای فەرمی سووریا لە زاری سەرچاوەیەکی حکومەتی وڵاتەکەیەوە بڵاویکردەوە، تا ئیسرائیل بەتەواوی پابەندی ڕێککەوتنی ڕاگرتنی گرژییەکان و کشانەوەی تەواوەتی لە خاکی سووریا نەبێت، زووە باس لە بوونی گفتوگۆ و ئاساییکردنەوەی پەیوەندیی لەگەڵ ئەو وڵاتەدا بکرێت.

چیرۆکی سەرەکی: 28ـی مانگی ڕابردوو تۆم باراک، نێردەی تایبەتی ئەمریکا بۆ سووریا ڕایگەیاند، ئیدارەی نوێی سووریا بە ئارامی دەستی بە دانوستان لەگەڵ ئیسرائیل کردووە و تێیدا گفتوگۆ لەسەر هەموو بابەتەکان دەکەن، واشنتنیش هاوکارییان دەبێت.

زانیاریی بەدەستهاتوو: سەرچاوەکەی حکومەتی سووریا قسەی بۆ کەناڵی "ئیخابەریە"ـی فەرمی وڵاتەکەی کردووە و ئەوەشی خستووەتەڕوو، بەبێ پابەندبوونی تەواوەتی ئیسرائیل بە ڕێککەوتنی ڕاگرتنی پێکدادان کە ساڵی 1974 واژۆکراوە لەگەڵ کشانەوەی تەواوەتی سوپای ئیسرائیل لە خاکی سووریا، ناکرێت باس لە ڕێککەوتنێکی نوێ بکرێت.

باسی لەوەشکردووە، بەبێ جێبەجێکردنی ئەو دوو مەرجە بەشێوەیەکی تەواو، زووە باس لە دانوستان و ڕێککەوتنی ئاساییکردنەوەی پەیوەندییەکان لەگەڵ ئیسرائیل بکرێت.