نێردەی ئەمریکا بۆ سووریا: دانوستانی دیمەشق و تەلئەبیب بە ئارامی بەڕێوەدەچێت

ئاڤا نیوز

نێردەی تایبەتی ئەمریکا بۆ سووریا دەڵێت، ئیدارەی نوێی سووریا بە ئارامی دەستی بە دانوستان لەگەڵ ئیسرائیل کردووە و تێیدا گفتوگۆ لەسەر هەموو بابەتەکان دەکەن، واشنتنیش هاوکارییان دەبێت.

چیرۆکی سەرەکی: بەپێی میدیای ئیسرائیل و سووریا ، لە ئێستادا دیمەشق و تەلئەبیب گفتوگۆ لەسەر ئاساییکردنەوەی پەیوەندییەکانیان دەکەن، چاوەڕێش دەکرێت پێش کۆتایی ئەمساڵ هەردوولا پەیوەندییەکانیان ئاسایی بکەنەوە.

لێدوانی فەرمی: تۆم باراک، نێردەی تایبەتی ئەمریکا بۆ سووریا بە میدیای قەتەری ڕاگەیاندووە، ئیسرائیل و سووریا گفتوگۆ لەسەر هەموو بابەتەکان دەکەن لەوانەش کێشەکانی سنوور و پێشڕەوی سەربازیی ئیسرائیل بۆ ناو خاکی سووریا، ئیدارەی نوێی دیمەشقیش لەگەڵ ئیسرائیلدا ناکۆک نییە و نایەوێت لەگەڵیدا بجەنگێت.

زانیاریی زیاتر: بە گوتەی باراک، پێویستە دەرفەتێک بە سووریا بدرێت لەم بوارەشدا واشنتن نایەوێت هیچ شتێک بەسەر سووریادا بسەپێنێت، بەڵکو هاوکارییان دەبێت ئەویش لەڕێگەی هەڵگرتنی سزاکانی سەر وڵاتەکە.